Tamil Nadu updates 6-11-2026

 thoothukudileaks daily news 

photo news by Arunan Reporter 

தூத்துக்குடிக்கு நவம்பர் 11-ல் வருகை தருகிறார் துணைக் குடியரசுத் தலைவர் சி.பி. ராதாகிருஷ்ணன்!

தூத்துக்குடி விமான நிலையம், வ.உ.சி. கல்லூரியில் பாதுகாப்பு ஏற்பாடுகள் குறித்து காவல்துறை உயர் அதிகாரிகள் நேரில் ஆய்வு!

தூத்துக்குடி:நவ 6

இந்திய துணைக் குடியரசுத் தலைவர் சி.பி. ராதாகிருஷ்ணன்  வரும் 11.11.2026 அன்று தூத்துக்குடி மாவட்டத்திற்கு வருகை தர உள்ளார். இதையொட்டி, தூத்துக்குடி வ.உ.சி. கல்லூரியில் நடைபெறவுள்ள விழாவில் அவர் பங்கேற்க உள்ளார்.

துணைக் குடியரசுத் தலைவரின் வருகையை முன்னிட்டு, பாதுகாப்பு ஏற்பாடுகள் குறித்து திருநெல்வேலி சரக காவல்துறை துணைத் தலைவர் முனைவர் இரா. திருநாவுக்கரசு, இ.கா.ப.,  தூத்துக்குடி வாகைகுளம் விமான நிலையம் மற்றும் வ.உ.சி. கல்லூரி ஆகிய இடங்களை நேரில் பார்வையிட்டு ஆய்வு மேற்கொண்டார்.

அப்போது, துணைக் குடியரசுத் தலைவரின் வருகையின்போது மேற்கொள்ளப்பட வேண்டிய பாதுகாப்பு நடவடிக்கைகள், பாதுகாப்புப் பணிகள் மற்றும் முன்னெச்சரிக்கை ஏற்பாடுகள் குறித்து காவல்துறை அதிகாரிகளுக்கு உரிய அறிவுரைகளை வழங்கினார்.

இந்த ஆய்வின்போது தூத்துக்குடி மாவட்ட காவல் கண்காணிப்பாளர் சிவபிரசாத், இ.கா.ப., மற்றும் காவல்துறை அதிகாரிகள் உடனிருந்தனர்.

 Tamil Nadu updates 

thoothukudileaks daily news 

photo news by Arunan Reporter 

திருச்செந்தூர் கந்த சஷ்டி திருவிழா: பாதுகாப்பு ஏற்பாடுகள் குறித்து காவல்துறை உயர் அதிகாரி நேரில் ஆய்வு!

பக்தர்களின் பாதுகாப்பு, போக்குவரத்து நெரிசலைத் தவிர்க்க அதிகாரிகளுக்கு அறிவுறுத்தல்

தூத்துக்குடி நவ6

தூத்துக்குடி மாவட்டம், திருச்செந்தூர் அருள்மிகு சுப்பிரமணிய சுவாமி திருக்கோவிலில் நடைபெறவுள்ள கந்த சஷ்டி திருவிழாவை முன்னிட்டு, பாதுகாப்பு மற்றும் போக்குவரத்து ஏற்பாடுகள் குறித்து திருநெல்வேலி சரக காவல்துறை துணைத் தலைவர் முனைவர் இரா. திருநாவுக்கரசு, இ.கா.ப., நேரில் ஆய்வு மேற்கொண்டார்.

இந்த ஆய்வின்போது கோவில் வளாகம், வாகன நிறுத்துமிடங்கள் உள்ளிட்ட முக்கிய பகுதிகளைப் பார்வையிட்டார். திருவிழாவிற்கு வருகை தரும் பக்தர்களின் பாதுகாப்பை உறுதி செய்வதுடன், போக்குவரத்து நெரிசல் ஏற்படாமல் பக்தர்கள் எளிதாக சுவாமி தரிசனம் செய்து திரும்புவதற்குத் தேவையான முன்னெச்சரிக்கை நடவடிக்கைகளைச் சிறப்பாக மேற்கொள்ள வேண்டும் என காவல்துறை அதிகாரிகளுக்கு அறிவுறுத்தினார்.

மேலும், திருவிழா காலத்தில் பக்தர்களுக்கு எவ்வித சிரமமும் ஏற்படாத வகையில் பாதுகாப்புப் பணிகளைத் திட்டமிட்டு செயல்படுத்துவதற்கான ஆலோசனைகளையும் வழங்கினார்.

இந்த ஆய்வில் தூத்துக்குடி மாவட்ட காவல் கண்காணிப்பாளர் சிவபிரசாத், இ.கா.ப., தூத்துக்குடி, தென்காசி, கன்னியாகுமரி மாவட்ட கூடுதல் காவல் கண்காணிப்பாளர்கள் மற்றும் திருச்செந்தூர் உட்கோட்ட துணைக் காவல் கண்காணிப்பாளர் உள்ளிட்ட காவல்துறை அதிகாரிகள் கலந்து கொண்டனர்.

 Tamil Nadu updates, 

thoothukudileaks daily news 

photo news by Arunan Reporter 

டாஸ்மாக் காலி மது பாட்டில்களுக்கு இனி ரொக்கம் கிடையாது!

ஒரு பாட்டிலுக்கு ரூ.10 வங்கிக் கணக்கில் வரவு  கியூஆர் குறியீடு, தானியங்கி இயந்திரம் மூலம் புதிய திட்டம்!

தூத்துக்குடி: நவ 6

தமிழகத்தில் டாஸ்மாக் கடைகளில் விற்பனை செய்யப்படும் மதுபானங்களின் காலி பாட்டில்களைத் திரும்பப் பெறும் நடைமுறையில் தமிழக அரசு புதிய மாற்றத்தைக் கொண்டு வந்துள்ளது. இனி காலி மது பாட்டில்களைத் திரும்ப ஒப்படைப்பவர்களுக்கு வழங்கப்படும் ரூ.10 ஊக்கத்தொகை ரொக்கமாக வழங்கப்படாமல், வங்கிக் கணக்கில் நேரடியாகச் செலுத்தும் வகையில் புதிய தொழில்நுட்பத் திட்டம் அறிமுகப்படுத்தப்பட உள்ளது.

இதற்கான அரசாணையை தமிழக அரசின் உள்துறை, மதுவிலக்கு மற்றும் ஆயத்தீர்வைத் துறை 29.10.2026 அன்று அரசாணை எண் 63-ன் கீழ் வெளியிட்டுள்ளது.

புதிய திட்டம் ஏன்?

நீதிமன்ற உத்தரவின்படி, மலைப்பகுதிகள், நீர்நிலைகள், வனப்பகுதிகள், சுற்றுலாத் தலங்கள் மற்றும் பொது இடங்களில் காலி மதுபானப் பாட்டில்கள் வீசப்படுவதைத் தடுக்கும் நோக்கில் பழைய காலி பாட்டில் திரும்பப் பெறும் திட்டம் அறிமுகப்படுத்தப்பட்டது.

இத்திட்டத்தின்படி, மதுபானத்தின் அதிகபட்ச சில்லறை விலையுடன் கூடுதலாக ரூ.10 வசூலிக்கப்பட்டு, காலி பாட்டிலைத் திரும்ப ஒப்படைக்கும்போது அந்தத் தொகை நுகர்வோருக்குத் திருப்பி வழங்கப்பட்டு வந்தது.

கடந்த 15.05.2022 அன்று நீலகிரி மாவட்டத்தில் தொடங்கப்பட்ட இத்திட்டம் பின்னர் தமிழகத்தின் பல்வேறு மாவட்டங்களுக்கும் விரிவுபடுத்தப்பட்டது.

ஆனால், பழைய நடைமுறையில் டாஸ்மாக் கடை ஊழியர்களுக்குக் கூடுதல் பணிச்சுமை, பாட்டில்களைச் சேமிப்பதற்கான இடப்பற்றாக்குறை, சுகாதாரப் பிரச்சினைகள், பாதுகாப்பு சிக்கல்கள், பணத்தைத் திருப்பி வழங்குவதில் ஏற்படும் தகராறுகள் உள்ளிட்ட பல்வேறு நடைமுறைச் சிக்கல்கள் ஏற்பட்டன. இதையடுத்து பழைய முறைக்குப் பதிலாகத் தொழில்நுட்ப அடிப்படையிலான புதிய திட்டத்தை அரசு அறிவித்துள்ளது.

புதிய திட்டம் எப்படி செயல்படும்?

இனி காலி மதுபானப் பாட்டில்களைத் திரும்பப் பெறுவதற்கு ஆங்கிலத்தில் 'Reverse Vending Machine' (RVM) எனப்படும் தானியங்கி பாட்டில் சேகரிப்பு இயந்திரங்கள் பயன்படுத்தப்பட உள்ளன.

• ஒரு தகுதியான காலி பாட்டிலுக்கு ரூ.10 ஊக்கத்தொகை வழங்கப்படும்.
• ஒவ்வொரு பாட்டிலிலும் தனித்துவமான கியூஆர் குறியீடு இடம்பெறும்.
• பாட்டிலை அங்கீகரிக்கப்பட்ட இயந்திரத்தில் செலுத்தி ஸ்கேன் செய்தால் அதன் உண்மைத்தன்மை சரிபார்க்கப்படும்.
• எந்தக் கடையில் பாட்டில் வாங்கப்பட்டிருந்தாலும், அங்கீகரிக்கப்பட்ட சேகரிப்பு மையத்தில் திரும்ப ஒப்படைக்கலாம்.

இனி பணம் வங்கிக் கணக்கில் மட்டுமே!

புதிய திட்டத்தின் முக்கிய மாற்றமாக, காலி பாட்டில்களைத் திரும்ப ஒப்படைப்பவர்களுக்கு வழங்கப்படும் ரூ.10 தொகை, அவர்களின் கைப்பேசி எண்ணுடன் இணைக்கப்பட்ட வங்கிக் கணக்கில் நேரடியாகச் செலுத்தப்படும்.

இதனால் சேகரிப்பு மையங்களில் ரொக்கப் பணம் வழங்கும் நடைமுறை இருக்காது. டாஸ்மாக் கடை ஊழியர்கள் பாட்டில்களை எண்ணுவது, சரிபார்ப்பது, பணம் திருப்பி வழங்குவது, கணக்குப் பராமரிப்பது போன்ற பணிகளில் ஈடுபடக்கூடாது என்றும் அரசு உத்தரவிட்டுள்ளது.

இந்தப் பணிகளை மேற்கொள்வதற்காகத் தனியாகத் திட்டச் செயல்பாட்டு நிறுவனம் (System Operator) தேர்வு செய்யப்பட உள்ளது.

எந்தப் பாட்டில்களுக்கு ரூ.10 கிடைக்காது?

கியூஆர் குறியீடு இல்லாத, சேதமடைந்த அல்லது குறியீட்டைத் தெளிவாகப் படிக்க முடியாத பாட்டில்கள், ஏற்கெனவே ஊக்கத்தொகை பெற்ற பாட்டில்கள், உடைந்த பாட்டில்கள் மற்றும் விதிமுறைகளுக்கு உட்படாத பாட்டில்களுக்கு ஊக்கத்தொகை கிடைக்காது. போலியான அல்லது பொருந்தாத குறியீடுகள் மூலம் பணம் பெறுவதையும் புதிய தொழில்நுட்பம் தடுக்கும்.

பழைய ஒப்பந்தங்கள் என்னவாகும்?

ஏற்கெனவே காலி பாட்டில்களைச் சேகரிப்பதற்காக வழங்கப்பட்டுள்ள ஒப்பந்தங்கள், புதிய தானியங்கி இயந்திரங்கள் ஒவ்வொரு பகுதியிலும் செயல்படத் தொடங்கிய பின்னர் படிப்படியாக முடிவுக்குக் கொண்டுவரப்படும் என அரசாணையில் தெரிவிக்கப்பட்டுள்ளது.

எப்போது நடைமுறைக்கு வரும்?

சுற்றுச்சூழல் மற்றும் சமூக நலச் செஸ் அமலுக்கு வரும் நாளிலிருந்து புதிய திட்டம் செயல்படுத்தப்பட உள்ளது. அதுவரை இடைக்கால ஏற்பாடாகக் கியூஆர் குறியீட்டை ஸ்கேன் செய்து பாட்டில்களைச் சேகரிப்பதற்கான நடவடிக்கைகளை மேற்கொள்ள டாஸ்மாக் நிர்வாக இயக்குநருக்கு அதிகாரம் வழங்கப்பட்டுள்ளது.

காலி மது பாட்டில்களைத் திரும்பப் பெறுவதில் வெளிப்படைத்தன்மையை ஏற்படுத்தவும், சுற்றுச்சூழல் மாசுபாட்டைக் குறைக்கவும், டாஸ்மாக் ஊழியர்களின் பணிச்சுமையைக் குறைக்கவும் இந்தப் புதிய நடைமுறை கொண்டு வரப்படுவதாக அரசின் அரசாணையில் தெரிவிக்கப்பட்டுள்ளது.

ரூ.10 பெற இனி காலி பாட்டிலுடன் ரொக்கப் பணம் வாங்கும் கவலை இல்லை; தொழில்நுட்பத்தின் மூலம் வங்கிக் கணக்கில் பணம் பெறும் புதிய நடைமுறை தமிழகத்தில் அறிமுகமாகிறது.

ஒரு பிரம்மாண்டமான Syndicate க்கு எதிரா சண்ட போட்டுட்டு இருக்காரு அமைச்சர் விக்னேஷ்.

TASMAC ஊழியர்கள், அவங்களோட ஒரே Demand, இப்ப இருக்குற சிஸ்டத்தை மாத்த Try பண்ணாத. நீயும் வந்து எங்க ஜோதியில ஐக்கியம் ஆகு, இருக்குற வரை எவ்ளோ வேணாலும் சம்பாதிச்சிட்டு போ. ஆனா பழைய Structure அப்படியே இருக்கணும் என்பது மட்டுமே..

அமைச்சர் விக்னேஷ் செய்யும் செயல், பெரிய கட்சிகளோட லோக்கல் கட்டமைப்பின் life line யயே கட் பண்றதுக்கு சமம்.

வருசத்துக்கு 1500 கோடி ன்னு பேசுறாங்க அதற்கும் மேலேயும் ....?

பகுதி, கிளை, வட்டம், மாவட்டம் ணு அவங்களோட Political Survival ல அந்தப் பணத்தோட Role ரொம்பப் பெருசு.

அந்த Chain யை கட் பண்ணப்போறாரு விக்னேஷ். 

அதனால்தான் இவ்வளவு நெருக்கடி. ஒத்துழையாமை போராட்டம் ?

Tamil Nadu updates, 5-11-2026

thoothukudileaks daily news 

photo news by Arunan Reporter 

தூத்துக்குடி:நவ5

தூத்துக்குடி மாநகராட்சி சார்பில் குழந்தைகள் தினத்தை முன்னிட்டு, வரும் நவம்பர் 14ஆம் தேதி சனிக்கிழமை மாலை 5 மணிக்கு முத்துநகர் கடற்கரை பூங்காவில் ‘Chutties for Cities – 2026’ என்ற தலைப்பில் சிறப்பு விழா நடைபெற உள்ளது.

பசுமையான, தூய்மையான தூத்துக்குடியை உருவாக்குவதில் மாணவர்களின் கருத்துக்கள் மற்றும் பங்களிப்பை ஊக்குவிக்கும் நோக்கில் இவ்விழா ஏற்பாடு செய்யப்பட்டுள்ளது.

இதையொட்டி மாணவர்களுக்குக் கட்டுரை, ஓவியம், வாக்கியம், சுவர் ஓவியம், கருத்துப் பதிவு, மாறுவேடப் போட்டி மற்றும் வழக்காடு மன்றம் உள்ளிட்ட பல்வேறு போட்டிகள் நடத்தப்பட உள்ளன.

கட்டுரை மற்றும் ஓவியப் போட்டிகள் 2026நவம்பர் 11ஆம் தேதி மாநகராட்சி மைய அலுவலகத்தில் நடைபெறும். மாறுவேடப் போட்டி, வழக்காடு மன்றத்தின் இறுதிச்சுற்று மற்றும் பரிசளிப்பு விழா ஆகியவை நவம்பர் 14ஆம் தேதி முத்துநகர் கடற்கரை பூங்காவில் நடைபெற உள்ளன.

ஒவ்வொரு போட்டியிலும் முதல் மூன்று இடங்களைப் பெறும் மாணவர்களுக்கு ‘Chutties for Cities – 2026’ விருதுகளும் பரிசுகளும் வழங்கப்பட உள்ளன.

இந்த விழாவில் பள்ளி, கல்லூரி மாணவர்கள் அனைவரும் ஆர்வத்துடன் பங்கேற்று தங்களது திறமைகளையும் படைப்பாற்றலையும் வெளிப்படுத்த வேண்டும் என தூத்துக்குடி மாநகராட்சி சார்பில் கேட்டுக்கொள்ளப்பட்டுள்ளது.

போட்டிகள் தொடர்பான விவரங்களுக்கு:

கிழக்கு மண்டலம்: 98425 30292

தெற்கு மண்டலம்: 94435 28621

வடக்கு மண்டலம்: 80563 47075

மேற்கு மண்டலம்: 94436 10511

 Tamil Nadu updates, thoothukudileaks 

photo news by Arunan Reporter 

தூத்துக்குடியில் பாலமுருகன் படுகொலை: சாதிய முன்விரோதமே பின்னணி! எவிடென்ஸ் அமைப்பு களஆய்வில் அதிர்ச்சித் தகவல்

சுடுகாட்டுப் பாதை ஆக்கிரமிப்பு விவகாரம், மகனுக்கு கொலை மிரட்டல் உள்ளிட்ட பல்வேறு காரணங்கள்; குடும்பத்துக்கு ரூ.12 லட்சம் நிவாரணம், அரசு வேலை வழங்க கோரிக்கை!

தூத்துக்குடி:நவ5

தூத்துக்குடி சோட்டையன்தோப்பு காந்திநகர் பகுதியைச் சேர்ந்த விடுதலைச் சிறுத்தைகள் கட்சியின் ஒட்டப்பிடாரம் ஒன்றிய துணைச் செயலாளர் பாலமுருகன் (42), கடந்த நவம்பர் 1-ஆம் தேதி காலை நான்கு பேர் கொண்ட கும்பலால் அரிவாளால் வெட்டிப் படுகொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.

இந்தப் படுகொலைக்கு பேனர் வைப்பது தொடர்பான மோதல் மட்டுமே காரணமா அல்லது அதன் பின்னணியில் சாதிய ரீதியிலான முன்விரோதம் உள்ளதா என்பது குறித்து எவிடென்ஸ் அமைப்பின் உண்மையறியும் குழுவினர் நவம்பர் 2-ஆம் தேதி சம்பவ இடத்தில் நேரடியாகக் களஆய்வு மேற்கொண்டனர். அந்த ஆய்வின் அடிப்படையில் வெளியிடப்பட்ட அறிக்கையில் பல்வேறு அதிர்ச்சித் தகவல்கள் தெரிவிக்கப்பட்டுள்ளன.

கொலை செய்யப்பட்ட பாலமுருகனுக்கு சுதா (40) என்ற மனைவியும், இசக்கிராஜா (22) என்ற மகனும், மாசான அனுசியா (20) என்ற மகளும் உள்ளனர். இவர் காய்கறிக் கடை நடத்தி வந்ததுடன், குட்டியானை வாகன ஓட்டுநராகவும் பணியாற்றி வந்துள்ளார்.

மகனைக் கொல்ல முயன்ற சம்பவம்:

கடந்த இரண்டு ஆண்டுகளுக்கு முன்பு பாலமுருகனின் மகன் இசக்கிராஜாவை மூன்று பேர் கொண்ட கும்பல் அரிவாளால் வெட்டிக் கொலை செய்ய முயன்றதாகவும், இதுகுறித்து வடபாகம் காவல் நிலையத்தில் வழக்குப் பதிவு செய்யப்பட்டதாகவும் எவிடென்ஸ் அமைப்பின் அறிக்கையில் தெரிவிக்கப்பட்டுள்ளது. இந்தச் சம்பவத்தில் தொடர்புடையவர்கள் பொன்பாண்டி என்ற ரவியின் ஆதரவாளர்கள் என்றும், இதன் காரணமாக பாலமுருகனுக்கும் ரவிக்கும் இடையே முன்விரோதம் இருந்து வந்ததாகவும் கூறப்பட்டுள்ளது.

சுடுகாட்டுப் பாதை விவகாரத்தில் மோதல்:

பொன்பாண்டி என்ற ரவியின் தேநீர்க் கடைக்கு அருகில் தலித் மக்களுக்கான சுடுகாடு அமைந்துள்ளது. அந்தச் சுடுகாட்டிற்குச் செல்லும் பாதை குறுகலாக இருப்பதால், அதற்குச் சுற்றுச்சுவர் அமைக்க தலித் மக்கள் முயன்றபோது, அந்த இடத்தில் தனக்கும் உரிமை இருப்பதாகக் கூறி ரவி எதிர்ப்பு தெரிவித்ததாகக் கூறப்படுகிறது.

மேலும், கட்டிடப் பகுதி ஆக்கிரமிப்பு மற்றும் சுடுகாட்டுப் பாதையை ஆக்கிரமிக்க முயற்சிப்பதாகக் கூறி தலித் மக்கள் போராட்டத்தில் ஈடுபட்டதாகவும், இந்தப் போராட்டத்தின் பின்னணியில் பாலமுருகன் இருப்பதாக ரவி சந்தேகித்ததாகவும் அறிக்கையில் குறிப்பிடப்பட்டுள்ளது.

கொலைச் சம்பவத்திற்கு ஒரு வாரத்திற்கு முன்பு பாலமுருகனின் மகனுக்கு கொலை மிரட்டல் விடுக்கப்பட்டதாகவும் தெரிவிக்கப்பட்டுள்ளது.

பேனர் வைப்பதில் தொடங்கிய வாக்குவாதம்:

பாலமுருகனின் மனைவியின் சகோதரி சுமதியின் மகளுக்கு நவம்பர் 1-ஆம் தேதி பூப்புனித நீராட்டு விழா நடத்த ஏற்பாடு செய்யப்பட்டிருந்தது. இதற்காக குடியிருப்புப் பகுதியில் பேனர் வைக்கும் பணியில் பாலமுருகனின் உறவினர்கள் ஈடுபட்டிருந்தபோது, அங்கு வந்த சிலர் பேனர் வைப்பது தொடர்பாக பாலமுருகனிடம் வாக்குவாதத்தில் ஈடுபட்டதுடன், சாதிய ரீதியாக இழிவாகப் பேசி அவதூறாகத் திட்டியதாக எவிடென்ஸ் அமைப்பின் களஆய்வு அறிக்கையில் கூறப்பட்டுள்ளது.

இதனைத் தொடர்ந்து, தனது இருசக்கர வாகனத்தில் பெட்ரோல் இல்லாததால் அருகிலுள்ள பெட்ரோல் விற்பனை நிலையத்திற்குப் பெட்ரோல் நிரப்ப வாகனத்தை உருட்டிச் சென்ற பாலமுருகனை, இரண்டு இருசக்கர வாகனங்களில் அரிவாள்களுடன் வந்த நான்கு பேர் கொண்ட கும்பல் வெட்டிப் படுகொலை செய்ததாகத் தெரிவிக்கப்பட்டுள்ளது.

6 பேர் மீது வழக்கு; 5 பேர் கைது:

இந்தச் சம்பவம் தொடர்பாக தாளமுத்துநகர் காவல் நிலையத்தில் குற்ற எண் 701/2026-ன் கீழ் பாரதிய நியாயச் சட்டம் மற்றும் வன்கொடுமைத் தடுப்புச் சட்டத்தின் தொடர்புடைய பிரிவுகளில் வழக்குப் பதிவு செய்யப்பட்டுள்ளதாக அறிக்கையில் தெரிவிக்கப்பட்டுள்ளது.

மேலும், இந்தக் கொலையில் நேரடியாக ஈடுபட்டவர்கள் மற்றும் தூண்டுதலில் ஈடுபட்டவர்கள் என மொத்தம் 6 பேர் மீது வழக்குப் பதிவு செய்யப்பட்டு, அவர்களில் 5 பேர் கைது செய்யப்பட்டு நீதிமன்றக் காவலுக்கு அனுப்பப்பட்டுள்ளதாகக் கூறப்பட்டுள்ளது.

முக்கியக் குற்றவாளியாகக் குறிப்பிடப்படும் பொன்பாண்டி என்ற ரவி திமுக நிர்வாகி என்றும் எவிடென்ஸ் அமைப்பின் அறிக்கையில் தெரிவிக்கப்பட்டுள்ளது.

தலித் அரசியல் செயல்பாட்டாளர்கள் படுகொலை அதிகரிப்பு:

பேனர் வைப்பது தொடர்பான மோதல் மட்டுமே இந்தப் படுகொலைக்குக் காரணமாக இருக்க முடியாது என்றும், அதன் பின்னணியில் சாதிய ரீதியிலான முன்விரோதம் மற்றும் சமூகப் பிரச்சினைகள் இருப்பதாகவும் எவிடென்ஸ் அமைப்பு சுட்டிக்காட்டியுள்ளது.

மேலும், பாலமுருகனைப் போன்ற தலித் அரசியல் செயல்பாட்டாளர்கள் ஆண்டுதோறும் 10 முதல் 12 பேர் வரை படுகொலை செய்யப்படுவதாகவும் அந்த அமைப்பு தனது அறிக்கையில் குறிப்பிட்டுள்ளது.

எவிடென்ஸ் அமைப்பின் பரிந்துரைகள்:

1. தலித் பெண்களை இழிவாகப் பேசியது மற்றும் தலித் மக்களின் சுடுகாட்டுப் பயன்பாட்டுக்குத் தடை ஏற்படுத்தியது உள்ளிட்ட குற்றச்சாட்டுகள் தொடர்பாக வன்கொடுமைத் தடுப்புச் சட்டத் திருத்தம் 2015-ன் கூடுதல் பிரிவுகளிலும் வழக்குப் பதிவு செய்ய வேண்டும்.

2. கொலை செய்யப்பட்ட பாலமுருகனின் குடும்பத்தினருக்கு ரூ.12 லட்சம் நிவாரணம் வழங்க வேண்டும்.

3. குடும்பத்தில் ஒருவருக்கு அரசு வேலை வழங்குவதுடன், மாதம் ரூ.18 ஆயிரம் ஓய்வூதியம் வழங்க வேண்டும்.

4. குடும்பத்தினருக்கு விவசாய நிலம் வழங்க வேண்டும்.

5. தலித் மக்களின் சுடுகாட்டிற்கு முறையான சுற்றுச்சுவர் கட்டிக் கொடுக்க வேண்டும்.

6. தலித் மக்கள் வசிக்கும் ஹவுசிங் போர்டு காலனியைப் புதுப்பித்து, தரமான வீடுகள் கட்டிக் கொடுக்க நடவடிக்கை எடுக்க வேண்டும்.

7. பாதிக்கப்பட்ட குடும்பம்

   
   
   

தூத்துக்குடியில் நிகழ்ந்துள்ள இந்தப் படுகொலை தொடர்பாக முழுமையான விசாரணை நடத்தி, சாதியப் பாகுபாடு மற்றும் முன்விரோதம் தொடர்பான குற்றச்சாட்டுகள் மீதும் உரிய நடவடிக்கை எடுக்க வேண்டும் என்ற கோரிக்கையை எவிடென்ஸ் அமைப்பு முன்வைத்துள்ளது.

Tamil Nadu updates,4-11-2026 thoothukudileaks 

தூத்துக்குடி, நவ.4:

தூத்துக்குடி ஆரோக்கியபுரம் வி.வி.டி. நினைவு மேல்நிலைப் பள்ளியில், தூத்துக்குடி மாவட்ட ஆட்சியருக்கு மாணவ, மாணவிகள் தீபாவளி வாழ்த்துக் கடிதம் எழுதும் நிகழ்ச்சியும், தமிழ் செம்மல் விருது பெற்ற அன்பழகனுக்கு பாராட்டு விழாவும் நடைபெற்றது.

4.11.2026 புதன்கிழமை காலை நடைபெற்ற இந்நிகழ்ச்சிக்கு பள்ளித் தலைமை ஆசிரியர் கணகரத்தின மணி தலைமை தாங்கினார். தூத்துக்குடி பத்திரிகையாளர் மன்றத் தலைவர் சண்முகசுந்தரம் முன்னிலை வகித்தார். சிறப்பு அழைப்பாளராகக் கலந்து கொண்ட தமிழ் செம்மல் விருது பெற்ற மோ. அன்பழகனுக்கு பள்ளியின் சார்பில் பொன்னாடை அணிவித்து பாராட்டுத் தெரிவிக்கப்பட்டது.

தொடர்ந்து, பள்ளியின் 10, 11 மற்றும் 12ஆம் வகுப்பு மாணவ, மாணவிகள் தூத்துக்குடி மாவட்ட ஆட்சியருக்கு தீபாவளி வாழ்த்துகளைத் தெரிவித்து கடிதங்கள் எழுதினர்.

தமிழ் செம்மல் விருது பெற்ற அன்பழகனைப் பாராட்டி நெடுஞ்சாலை கவிஞர் செல்வராஜ் வாழ்த்துக் கவிதை வாசித்தார். பத்திரிகையாளர் மன்றத் தலைவர் சண்முகசுந்தரம், லாரன்ஸ் ஆகியோர் வாழ்த்துரை வழங்கினர்.

நிகழ்ச்சியின் நிறைவாக தூத்துக்குடி மாவட்ட புத்தக வாசிப்பு மன்றத் தலைவர் எழுத்தாளர் ஆ. மாரிமுத்து நன்றியுரை வழங்கினார். நிகழ்ச்சியைப் பள்ளியின் விளையாட்டு ஆசிரியர் ஜீசஸ் ஆல்பன் தொகுத்து வழங்கினார்.

இதில் பள்ளி ஆசிரியர்கள் மற்றும் மாணவ, மாணவிகள் கலந்து கொண்டு சிறப்பித்தனர். விழாவிற்கான ஏற்பாடுகளை தூத்துக்குடி மாவட்ட புத்தக வாசிப்பு மன்றத்தினர் செய்திருந்தனர்.

Tamil Nadu updates, photo news by Arunan journalist 4-11-2026

தூய்மைப் பணியாளர்கள், ஆட்டோ ஓட்டுநர்களுக்கு தீபாவளி பரிசுகள் வழங்கிய மேயர் ஜெகன் பெரியசாமி!

தூத்துக்குடி, நவ. 4:

தீபாவளி பண்டிகையை முன்னிட்டு தூத்துக்குடி மாநகராட்சி 3-வது வார்டு பகுதியில் பணியாற்றும் தூய்மைப் பணியாளர்கள் மற்றும் ஹவுசிங் போர்டு காலனி ஆட்டோ ஓட்டுநர்களுக்கு தீபாவளி பரிசுகள் வழங்கும் நிகழ்ச்சி இன்று (நவம்பர் 4) காலை 11 மணியளவில் ஹவுசிங் போர்டு காலனியில் நடைபெற்றது.

தூத்துக்குடி மாநகராட்சி மேயர் ஜெகன் பெரியசாமி தலைமையில் நடைபெற்ற இந்நிகழ்ச்சிக்கு, 3-வது வார்டு மாமன்ற உறுப்பினர் ரெங்கசாமி ஏற்பாடு செய்திருந்தார்.

நிகழ்ச்சியில் தூய்மைப் பணியாளர்கள் மற்றும் ஆட்டோ ஓட்டுநர்களுக்கு மேயர் ஜெகன் பெரியசாமி தீபாவளி பரிசுகளை வழங்கி வாழ்த்துகளைத் தெரிவித்தார்.

அப்போது மேயர்,ஜெகன் பெரியசாமி பேசியதாவது 

 தூத்துக்குடி மாநகரைத் தூய்மையாகவும் சுகாதாரமாகவும் வைத்திருக்க தூய்மைப் பணியாளர்களின் பங்கு மிகவும் முக்கியமானது. அவர்களின் அர்ப்பணிப்பான உழைப்பும் சேவையும் பாராட்டுக்குரியது.

அதேபோல், பொதுமக்களின் போக்குவரத்துத் தேவையை நிறைவேற்றும் ஆட்டோ ஓட்டுநர்களின் சேவையும் பாராட்டுக்குரியது. 

சமூகத்தின் அன்றாடத் தேவைகளில் முக்கியப் பங்காற்றும் அனைவருக்கும் தீபாவளி வாழ்த்துகளைத் தெரிவித்துக் கொள்கிறேன் என்று கூறினார்.

இதனையடுத்துமேயர் ஜெகன் பெரியசாமி தூய்மைப் பணியாளர்களுக்கும் ஆட்டோ  ஓட்டுநர்களுக்கும் தீபாவளி பரிசுகள் வழங்கினார் . 

இந்நிகழ்ச்சியில் தூத்துக்குடி மாநகராட்சி 3-வது வார்டு பகுதியைச் சேர்ந்த தூய்மைப் பணியாளர்கள், ஆட்டோ ஓட்டுநர்கள் மற்றும் உள்ளூர் நிர்வாகிகள் கலந்து கொண்டனர்.

தூய்மைப் பணியாளர்களின் சேவையைப் பாராட்டி, அவர்களுடன் மகிழ்ச்சியைப் பகிர்ந்து கொள்ளும் வகையில் இந்நிகழ்ச்சி நடைபெற்றது.