Tamil Nadu updates 

photo news by Arunan Reporter 

ஸ்டெர்லைட் வழக்குகளின் தற்போதைய நிலை குறித்து மூத்த வழக்கறிஞர் ஹென்றி திபேன் ஆலோசனை!

தூத்துக்குடி: நவ 14

ஸ்டெர்லைட் ஆலைக்கு எதிரான போராட்டம் மற்றும் அது தொடர்பான வழக்குகளின் தற்போதைய நிலை, நீதிமன்ற நடவடிக்கைகள் குறித்து மூத்த வழக்கறிஞர் ஹென்றி திபேன் தலைமையில் ஆலோசனைக் கூட்டம் நடைபெற்றது. 

தூத்துக்குடி பெல் ஹோட்டலில் இன்று (நவம்பர் 14, சனிக்கிழமை) மாலை 6 மணி முதல் இரவு 8 மணி வரை  நடைபெற்ற இக்கூட்டத்தில், ஸ்டெர்லைட் தொடர்பான வழக்குகளின் தற்போதைய நிலை, நீதிமன்றத்தில் நடைபெற்று வரும் நடவடிக்கைகள் மற்றும் அடுத்தகட்ட சட்ட நடவடிக்கைகள் குறித்து விரிவாகக் கலந்தாலோசிக்கப்பட்டது.

“ஸ்டெர்லைட் தொடர்பான வழக்குகள் குறித்து ஒரு உரையாடல்” என்ற தலைப்பில் நடைபெற்ற இந்நிகழ்ச்சியில், ஸ்டெர்லைட் எதிர்ப்புச் செயல்பாட்டாளர்கள் மற்றும் பொதுமக்கள் என ஏராளமானோர் கலந்து கொண்டனர்..

Tamil Nadu updates 

திருச்சி நவ14

அகில பாரதிய சன்னியாசிகள் சங்கம் மற்றும் அன்னை காவிரி நதிநீர் பாதுகாப்பு அறக்கட்டளை சார்பில் நடைபெறும் 16-ஆம் ஆண்டு காவிரி விழிப்புணர்வு துலா தீர்த்த ரதயாத்திரைக்கு ஸ்ரீரங்கத்தில் சிறப்பான வரவேற்பு அளிக்கப்பட்டது.

தலைக்காவிரி முதல் பூம்புகார் வரை நடைபெறும் இந்த ரதயாத்திரைக்கு, அகில பாரதிய சன்னியாசிகள் சங்க நிறுவனர் தவத்திரு சுவாமி ராமானந்தா மகராஜ் தலைமை தாங்கினார். அனைத்திந்திய இந்து திருக்கோயில்கள் பாதுகாப்பு சங்கத்தின் தேசிய தலைவர் மற்றும் அன்னை காவிரி நதிநீர் பாதுகாப்பு அறக்கட்டளையின் இணைச் செயலாளர் சேவரத்னா அருள்வேலன் ஜி தலைமையில் வரவேற்பு நிகழ்ச்சி நடைபெற்றது.

இதனைத் தொடர்ந்து ஸ்ரீரங்கம் சிருங்கேரி மடத்தில் இருந்து காவிரி ரதம், ஆதீனங்கள், ஜீயர்கள், துறவியர்கள் மற்றும் பொதுமக்கள் பங்கேற்ற ஊர்வலம் அம்மா மண்டபம் காவிரி படித்துறையைச் சென்றடைந்தது.

அங்கு மன்னார்குடி செண்டலங்கார செண்பக மன்னார் சம்பத்குமார இராமானுஜ சுவாமிகள், கோவை காமாட்சிபுரம் ஆதீனம் பஞ்சலிங்கேஸ்வர சுவாமிகள் உள்ளிட்ட ஆதீனங்கள், ஜீயர்கள் மற்றும் துறவியர்கள் ஆசியுரை வழங்கினர்.

தொடர்ந்து காவிரி தாய்க்கு பல்வேறு திரவியங்களால் சிறப்பு அபிஷேகம் செய்யப்பட்டு மகா தீபாராதனை நடைபெற்றது. பக்தர்கள் காவிரி தாயை வழிபட்டனர். பின்னர் காவிரி படித்துறையில் ஆதீனங்கள், ஜீயர்கள், துறவியர்கள் மற்றும் பொதுமக்கள் இணைந்து காவிரி நதிக்கு மகா ஆரத்தி எடுத்து வழிபாடு நடத்தினர்.

இந்நிகழ்ச்சியில் சேலம் ஸ்ரீதேவி மற்றும் தூத்துக்குடி ஜெயலெட்சுமி ஆகியோர் காவிரி நதியின் முக்கியத்துவம் மற்றும் நீர் பாதுகாப்பின் அவசியம் குறித்து விழிப்புணர்வு உரையாற்றினர்.

திருச்சியைச் சேர்ந்த தொழிலதிபர்கள், ஆன்மிகப் பெரியவர்கள், சங்க நிர்வாகிகள் மற்றும் பல்வேறு மாவட்டங்களைச் சேர்ந்த பொறுப்பாளர்கள் கலந்து கொண்டனர். விழாவின் நிறைவில் பொதுமக்களுக்கு அன்னதானம் வழங்கப்பட்டது.

விழாவிற்கான ஏற்பாடுகளை

 அனைத்திந்திய இந்து திருக்கோயில்கள் பாதுகாப்பு சங்கத்தின் திருச்சி மண்டல மாநில மற்றும் மாவட்ட நிர்வாகிகள் சிறப்பாக செய்திருந்தனர்.

அதன் விவரமாவது...

அனைத்திந்திய இந்து திருக்கோயில்கள் பாதுகாப்பு சங்கத்தின் திருச்சி மண்டலத்தின் மாநில, மாவட்ட பொறுப்பாளர்கள் காவிரி.ராமகிருஷ்ணன்,சிவத்திரு.ஜெகதீசன் ஐயா, துறையூர் மணி ஜி,சதீஸ்குமார் ஜி, சுந்தரேசன் , வாழைக்காய் வியாபாரி சேட், கருணாநீதி, தியானேஸ்வரன், வெங்கடேஷ், வீரமணி, அர்ச்சகர் விஷ்ணு, மதியழகன், சிவ. சீமாரங்கவல்லி, விமலாராணி, ஜெயலெட்சுமி, சரவணன், பூசாரி ரவி, கண்ணன்ஆகியோர் மிக சிறப்பாக செய்திருந்தனர்.

மேலும் இந்த விழாவில் சங்கத்தின் பொறுப்பாளர்கள் கோவை செந்தில்குமார், சேலம் ரமேஷ், திருப்பூர் செந்தில், திருநெல்வேலி நளினி, கோவை யமுனா,பழனிமுத்து, சத்யா, மல்லிகா, ஆனந்தி,திவ்யா, சீதாலட்சுமி,சரஸ்வதி, சத்யா, ஜோதிலட்சுமி ஆகியோரும் கலந்து கொண்டனர்.

தூத்துக்குடி மாநகராட்சியில் 11 சதவீதம் வரை கமிஷன் வசூலா?

பணிகளைப் பார்வையிடாமல் கையெழுத்திட 5 சதவீதம் கேட்பதாக ஒப்பந்ததாரர்கள் புகார்  ஆணையர் நடவடிக்கை எடுப்பாரா?

தூத்துக்குடி: நவ 14

தமிழகத்தில் லஞ்சம் இல்லாத தூய்மையான ஆட்சி அமைப்போம் என முதலமைச்சர் ஜோசப் விஜய் தொடர்ந்து வலியுறுத்தி வரும் நிலையில், தூத்துக்குடி மாநகராட்சியில் பொறியியல் துறையில் ஒப்பந்தப் பணிகளுக்கு 9 முதல் 11 சதவீதம் வரை கமிஷன் வசூலிக்கப்படுவதாகப் புகார் எழுந்துள்ளது.

மாநகராட்சியின் பொறியியல் பிரிவில் உயர் பொறுப்பில் உள்ள அதிகாரி ஒருவர், பணிகளை நேரில் பார்வையிட்டு கையெழுத்திட 3 சதவீதமும், பணிகளைப் பார்வையிடாமல் அலுவலகத்தில் இருந்தபடியே கையெழுத்திட 5 சதவீதமும் கமிஷன் கேட்பதாக ஒப்பந்ததாரர்கள் தரப்பில் குற்றச்சாட்டு முன்வைக்கப்படுகிறது.

இதுதொடர்பாக மாநகராட்சி ஆணையர் பிரியங்காவிடம் ஒப்பந்ததாரர் ஒருவர் புகார் தெரிவித்தும், சம்பந்தப்பட்ட அதிகாரி மீது இதுவரை நடவடிக்கை எடுக்கப்படவில்லை எனக் கூறப்படுகிறது. மேலும், அடுத்தடுத்த நிலையில் உள்ள ஐந்து அதிகாரிகளுக்கும் தலா ஒரு சதவீதம் வரை கமிஷன் வழங்க வேண்டியுள்ளதாகப் புகார் தெரிவிக்கப்படுகிறது.

முன்பு 5 முதல் 6 சதவீதமாக இருந்ததாகக் கூறப்படும் கமிஷன் தற்போது 9 முதல் 11 சதவீதம் வரை அதிகரித்துள்ளதாக ஒப்பந்ததாரர்கள் தரப்பில் வேதனை தெரிவிக்கப்படுகிறது.

தமிழகத்தில் நகராட்சி நிர்வாகத் துறை முதலமைச்சர் ஜோசப் விஜய்யின் நேரடிக் கட்டுப்பாட்டில் உள்ள நிலையில், தூத்துக்குடி மாநகராட்சியில் எழுந்துள்ள இந்தக் கமிஷன் புகார் குறித்து உரிய விசாரணை நடத்தி நடவடிக்கை எடுக்கப்படுமா?

முதலமைச்சரின் தூய்மை ஆட்சி முழக்கம் தூத்துக்குடி மாநகராட்சியிலும் எதிரொலிக்குமா? 

Tamil Nadu updates thoothukudileaks daily news 

photo news by Arunan Reporter 13-11-2026

தூத்துக்குடி:நவ 13

ஸ்டெர்லைட் ஆலைக்கு எதிரான போராட்டத்தின்போது உயிரிழந்த தனது மகனுக்கு, மற்ற உயிரிழந்தவர்களின் குடும்பங்களுக்கு வழங்கியது போல் ரூ.20 லட்சம் இழப்பீடும், குடும்பத்தில் ஒருவருக்கு அரசு வேலையும் வழங்க வேண்டும் எனக் கோரி, கயல்விழி என்ற தாய் தூத்துக்குடி மாவட்ட ஆட்சியரிடம் மனு அளித்துள்ளார்.

ஒட்டப்பிடாரம் அருகே கீழமுடி மண் பகுதியைச் சேர்ந்த கயல்விழியின் மகன் ஜஸ்டின் செல்வா மதிஷ், ஸ்டெர்லைட் போராட்டத்தின்போது காயமடைந்து தூத்துக்குடி அரசு மருத்துவமனையில் சிகிச்சை பலனின்றி உயிரிழந்தார்.

தனது மகனுக்கு இதுவரை ரூ.5 லட்சம் மட்டுமே இழப்பீடு வழங்கப்பட்டுள்ளதாகவும், நீதியரசர் அருணா ஜெகதீசன் ஆணையத்தின் பரிந்துரைப்படி உரிய இழப்பீடு வழங்க வேண்டும் என்றும் மனுவில் தெரிவித்துள்ளார்.

மேலும், தமிழக வெற்றிக் கழகம் அறிவித்துள்ள ரூ.25 லட்சத்தையும் சேர்த்து மொத்தம் ரூ.45 லட்சம் இழப்பீடும், குடும்பத்தில் ஒருவருக்கு அரசு வேலையும் வழங்கி தனது குடும்பத்திற்கு நீதி கிடைக்க நடவடிக்கை எடுக்க வேண்டும் என மாவட்ட ஆட்சியரிடம் கோரிக்கை விடுத்துள்ளார்.

தூத்துக்குடி புவனேஸ்வரி டிரேடர்ஸ் நிறுவனத்தில் சூப்பர்வைசராகப் பணிபுரிந்து வந்த . செந்தில் (வயது 43) என்பவர் கடந்த நவம்பர் 5-ஆம் தேதி சிப்காட் பைபாஸ் சாலையில் ஏற்பட்ட விபத்தில் படுகாயமடைந்து, அரசு மருத்துவமனையில் சிகிச்சை பலனின்றி உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. இச்சம்பவம் குறித்துச் சட்ட உரிமைகள் கழகம் தனது ஆழ்ந்த வருத்தத்தையும் கண்டனத்தையும் பதிவு செய்கிறது.

பாதிக்கப்பட்ட செந்தில் பொது வார்டுக்கு மாற்றப்பட்டு, இயல்பு நிலைக்குத் திரும்பிய சூழலில், திடீரென கல்லீரல் மற்றும் மண்ணீரல் பாதிப்பைக் காரணம் காட்டி அவசர அறுவை சிகிச்சை செய்யப்பட்டுள்ளது. இத்தகைய உயிருக்கு ஆபத்தான, தீவிரமான அறுவை சிகிச்சையை மூத்த மருத்துவர்கள் (Senior Doctors) முன்னின்று நடத்தாமல், வெறும் 3 ஆண்டுகள் மட்டுமே அனுபவமுள்ள ஒரு உதவி மருத்துவரைக் (Junior Doctor) கொண்டு அவசரகதியாக நடத்தியதே இந்த மரணத்திற்கு முக்கியக் காரணம் என்று பாதிக்கப்பட்ட குடும்பத்தினர் குற்றம் சாட்டுகின்றனர். இது அப்பட்டமான மருத்துவ அலட்சியம் (Medical Negligence) என்ற சந்தேகத்தை எழுப்புகிறது.

பாதிக்கப்பட்ட நபர் தீவிர சிகிச்சை பிரிவில் (ICU) இருந்தபோது பெறப்பட்ட வாக்குமூலத்தின் அடிப்படையில், விபத்தை ஏற்படுத்திய அடையாளம் தெரியாத வாகனத்தைக் கண்டறிந்து, அதன் பின்னணியில் உள்ள உண்மைத் தன்மையை முழுமையாக வெளிக்கொண்டு வர வேண்டியது அவசியமாகிறது. இதில் எந்தவிதமான வெளி அழுத்தங்களுக்கும் இடம் தராமல், சட்டம் தன் கடமையைச் செய்ய வேண்டும்.

உண்மையான காரணங்கள் கண்டறியப்படும் வரையிலும், இந்த மரணத்திற்குப் பொறுப்பானவர்கள் மீது உரிய நடவடிக்கை எடுக்கும் வரையிலும் உடலைப் பிரேதப் பரிசோதனை செய்யவோ, வாங்கவோ போவதில்லை எனப் பாதிக்கப்பட்ட குடும்பத்தினர் எடுத்துள்ள முடிவிற்குச் சட்ட உரிமைகள் கழகம் முழு ஆதரவை வழங்குகிறது.

சட்ட உரிமைகள் கழகத்தின் முக்கியக் கோரிக்கைகள்:

*1. சிறப்புக் குழு விசாரணை:* செந்திலின் மரணம் குறித்து மாவட்ட ஆட்சியர் மற்றும் மருத்துவத் துறை உயர்மட்ட அதிகாரிகள் முன்னிலையில் ஒரு சிறப்புக் குழு (Special Medical Board) அமைத்து முறையான விசாரணை நடத்தப்பட வேண்டும்.

*2. காவல்துறைக்குக் கோரிக்கை:* விபத்து ஏற்படுத்திய வாகனத்தை விரைந்து கண்டறியவும், விபத்தின் பின்னணியில் உள்ள அனைத்து விபரங்களையும் வெளிப்படையாக விசாரித்து பாதிக்கப்பட்ட குடும்பத்தினரின் சந்தேகங்களைப் போக்க வேண்டும் என்றும் காவல்துறைக்குச் சட்ட உரிமைகள் கழகம் கோரிக்கை வைக்கிறது.

*3. உரிய நிவாரணம்:* உயிரிழந்த செந்திலின் குடும்பத்திற்குப் புவனேஸ்வரி டிரேடர்ஸ் நிறுவனம் மற்றும் தமிழக அரசு உடனடியாக உரிய நிதியுதவி மற்றும் இழப்பீடு வழங்க வேண்டும்.

பாதிக்கப்பட்ட குடும்பத்திற்கு நீதி கிடைக்கும் வரை சட்ட உரிமைகள் கழகம் தார்மீக ரீதியாகவும் சட்டப்பூர்வமாகவும் என்றும் துணையாக இருக்கும்.

Dr. S.R. செல்வம் கிறிஸ்டோபர்

நிறுவனத் தலைவர்

சட்ட உரிமைகள் கழகம்

குழந்தைகள் தின விழாவிலும் மக்கள் பிரதிநிதிகளுக்கு அழைப்பில்லையா? தூத்துக்குடி கவுன்சிலர்கள் புலம்பல்!!!!

தூத்துக்குடி, நவ.10:

தூத்துக்குடி மாநகராட்சி சார்பில் குழந்தைகள் தினத்தை முன்னிட்டு நவம்பர் 11 முதல் 14-ம் தேதி வரை பல்வேறு போட்டிகள் மற்றும் கொண்டாட்ட நிகழ்ச்சிகள் நடைபெற உள்ளன.

 இந்நிகழ்ச்சிகளுக்கான அழைப்பிதழில் மக்களால் தேர்ந்தெடுக்கப்பட்ட மாமன்ற உறுப்பினர்களின் பெயர்கள் இடம்பெறாதது சர்ச்சையை ஏற்படுத்தியுள்ளது. 

குழந்தைகள் தினக் கொண்டாட்டத்தை முன்னிட்டு கட்டுரைப் போட்டி, ஓவியப் போட்டி, வழக்காடு மன்றம் உள்ளிட்ட பல்வேறு நிகழ்ச்சிகளுக்கு மாநகராட்சி நிர்வாகம் ஏற்பாடு செய்துள்ளது. 

நவம்பர் 11-ம் தேதி மாநகராட்சி மைய அலுவலகத்தில் ஓவியப் போட்டி மற்றும் கட்டுரைப் போட்டிகளும், நவம்பர் 14-ம் தேதி முத்துநகர் கடற்கரைப் பூங்காவில் பல்வேறு போட்டிகள் மற்றும் பரிசளிப்பு விழாவும் நடைபெற உள்ளன.

இந்நிகழ்ச்சிகளுக்காக வெளியிடப்பட்டுள்ள அழைப்பிதழில் மாநகராட்சி ஆணையர் பெயரும், சுகாதார அலுவலர்களின் பெயர்களும் இடம்பெற்றுள்ள நிலையில், மக்களால் தேர்ந்தெடுக்கப்பட்ட மாமன்ற உறுப்பினர்கள் யாருடைய பெயரும் இடம்பெறவில்லை எனக் கூறப்படுகிறது.

தூத்துக்குடி மாநகராட்சியில் 60 வார்டுகள் உள்ள நிலையில், விழா நடைபெறும் பகுதிகளைச் சேர்ந்த மாமன்ற உறுப்பினர்களின் பெயர்கள்கூட அழைப்பிதழில் இடம்பெறாதது ஏன் என்ற கேள்வி எழுந்துள்ளது.

இதுகுறித்து சமூக ஆர்வலர் ஒருவர் கூறுகையில்.....

, மக்களால் தேர்ந்தெடுக்கப்பட்ட மாமன்ற உறுப்பினர்களின் பதவிக்காலம் அடுத்த ஆண்டு பிப்ரவரி மாதம் வரை உள்ளது. 

ஆனால்?  தமிழகத்தில் ஆட்சி மாற்றம் ஏற்பட்ட பிறகு, தூத்துக்குடி மாநகராட்சி அதிகாரிகள் மக்கள் பிரதிநிதிகளைத் தொடர்ந்து புறக்கணித்து வருவதாக கவுன்சிலர்கள் கூறுகின்றனர் 

கடந்த ஆறு மாதங்களாக மாநகராட்சி சார்பில் நடைபெறும் பல்வேறு நிகழ்ச்சிகளுக்கு மக்கள் பிரதிநிதிகள் அழைக்கப்படுவதில்லை. அந்தந்த வார்டுகளில் உள்ள குறைகள் குறித்து கவுன்சிலர்கள் தெரிவித்தாலும் மாநகராட்சி அதிகாரிகள் உரிய நடவடிக்கை எடுப்பதில்லை என்ற புகாரும் உள்ளது.

குழந்தைகள் தினக் கொண்டாட்ட நிகழ்ச்சியில்கூட மக்கள் பிரதிநிதிகளின் பெயர்களை இடம்பெறச் செய்யாமல் விழா நடத்துகின்றனர் 

தூத்துக்குடி மாநகராட்சி நிர்வாகம் மக்கள் பிரதிநிதிகளுக்கு உரிய அங்கீகாரம் வழங்க வேண்டும் என்றார்.

Tamil Nadu updates,9-11-2026

 thoothukudileaks daily news 

photo news by Arunan Reporter 

தீபாவளிக்கு போட்டி போட்டுக் கொண்டு மகிழ்வித்த இரண்டு பத்திரிகையாளர் சங்கங்கள்!

பத்திரிகையாளர்களின் குடும்பங்களுக்கு பரிசுப் பொருட்கள் வழங்கி உற்சாகம் – நிர்வாகிகளுக்கு உறுப்பினர்கள் மனமார்ந்த நன்றி!

தூத்துக்குடி:நவ 9

தீப ஒளித் திருநாளை முன்னிட்டு தூத்துக்குடியில் செயல்பட்டு வரும் பியர்ல் சிட்டி பிரஸ் கிளப் மற்றும் தூத்துக்குடி பிரஸ் கிளப் ஆகிய இரண்டு பத்திரிகையாளர் சங்கங்களும் தங்களது உறுப்பினர்களின் குடும்பங்களில் மகிழ்ச்சியை ஏற்படுத்தும் வகையில் போட்டி போட்டுக்கொண்டு தீபாவளிப் பரிசுப் பொருட்களை வழங்கி சிறப்பித்துள்ளன.

இந்து சமயத்தின் முக்கியப் பண்டிகைகளில் ஒன்றான தீபாவளி, மதங்களைக் கடந்து அனைத்து தரப்பு மக்களாலும் மகிழ்ச்சியுடன் கொண்டாடப்படும் திருநாளாக விளங்குகிறது. இருள் நீங்கி ஒளி பிறப்பதையும், தீமைகள் அகன்று நன்மை வெல்வதையும் உணர்த்தும் இந்நாளில், ஜனநாயகத்தின் நான்காவது தூணாக விளங்கும் பத்திரிகைத் துறையில் பணியாற்றும் நாளிதழ் நிருபர்கள், புகைப்படக் கலைஞர்கள், தொலைக்காட்சி செய்தியாளர்கள் மற்றும் ஒளிப்பதிவாளர்களின் குடும்பங்களும் மகிழ்ச்சியுடன் தீபாவளியைக் கொண்டாட வேண்டும் என்ற நோக்கில் இந்த ஏற்பாடுகள் செய்யப்பட்டன.

தூத்துக்குடி பிரஸ் கிளப் சார்பில்... உறுப்பினர்களுக்கு பேன்ட், சட்டை, சீனி, உளுந்தம்பருப்பு, கடலைப்பருப்பு, தேங்காய், கடலைமிட்டாய், காரசேவு, உப்பு, குங்குமம், சந்தனம், விபூதி உள்ளிட்ட அத்தியாவசியப் பொருட்கள் வழங்கப்பட்டன.

இதற்கான ஏற்பாடுகளை சங்கத் தலைவர் சண்முகசுந்தரம், செயலாளர் மோகன்ராஜ், பொருளாளர் ராஜு ஆகியோர் செய்திருந்தனர்.

பியர்ல் சிட்டி பிரஸ் கிளப் சார்பில்.. பத்திரிகையாளர்களின் குழந்தைகளும் தீபாவளிப் பண்டிகையை உற்சாகமாகக் கொண்டாடும் வகையில் நவீன ரக பட்டாசுகள் அடங்கிய வெடிப் பார்சலும், இனிப்பு வகைகள் அடங்கிய ஸ்வீட் பாக்ஸும் வழங்கப்பட்டன.

இதற்கான ஏற்பாடுகளை சங்கத் தலைவர் ராஜா சிதம்பரம், செயலாளர் காட்சன், பொருளாளர் ராஜேஷ் மற்றும் ஆலோசகர் சீனிவாசன் ஆகியோர் சிறப்பாகச் செய்திருந்தனர்.

இரு சங்கங்களின் இந்த அன்பான ஏற்பாடுகளால் பத்திரிகையாளர்களின் குடும்பத்தினர் மகிழ்ச்சி அடைந்தனர். இதனைத் தொடர்ந்து நாளிதழ் மற்றும் தொலைக்காட்சிகளில் பணியாற்றும் சங்க உறுப்பினர்கள், இரு சங்கங்களின் நிர்வாகிகளுக்கும் தங்களது மனமார்ந்த நன்றியையும் பாராட்டுகளையும் தெரிவித்தனர்.

தந்தை வழியில் தனயன்!

முன்னாள் தூத்துக்குடி மாவட்ட திமுக செயலாளரும் சட்டமன்ற உறுப்பினருமான மறைந்த பெரியசாமி, தீபாவளி, தமிழ் புத்தாண்டு, பொங்கல் உள்ளிட்ட பண்டிகைக் காலங்களில் கட்சியினருக்கும் பத்திரிகைத் துறை நண்பர்களுக்கும் அன்பளிப்புகள் வழங்கி மகிழ்விப்பதை வழக்கமாகக் கொண்டிருந்தார். அவர் கடைப்பிடித்து வந்த அந்தப் பழக்கத்தை நினைவூட்டும் வகையில், அவரது மகனும் தூத்துக்குடி மாநகராட்சி மேயருமான ஜெகன் பெரியசாமியும் இந்த ஆண்டு கட்சி ஆதரவாளர்கள் மற்றும் பத்திரிகை நிருபர்களுக்கு தீபாவளி அன்பளிப்புகளை வழங்கி மகிழ்வித்துள்ளார்.

தீபாவளி என்பது வெறும் பட்டாசு, புத்தாடை, இனிப்பு கொண்டாட்டம் மட்டுமல்ல; ஒருவருக்கொருவர் அன்பையும் மகிழ்ச்சியையும் பகிர்ந்து கொள்ளும் திருநாள் என்பதை இந்த நிகழ்வுகள் மீண்டும் உணர்த்தியுள்ளன.

செய்தி கட்டுரை 

ரோஜா அருணன் செய்தியாளர்