Tamil Nadu updates photo news by Arunan journalist 

தூத்துக்குடி அருகே கசங்காத்த பெருமாள் கோவிலில் புரட்டாசி 5-வது சனிக்கிழமை சிறப்பு வழிபாடு கோலாகலம்!

1008 விஷ்ணு சகஸ்ர நாம அர்ச்சனை – அன்னதானம், சிறப்பு பஜனை நிகழ்ச்சிகளில் திரளான பக்தர்கள் பங்கேற்பு!

தூத்துக்குடி, அக்.17:

தூத்துக்குடி மாவட்டம் குறுக்குச்சாலை அருகே பூங்காவனத்தில் அமைந்துள்ள அருள்மிகு ஸ்ரீ கசங்காத்த பெருமாள் சுவாமி திருக்கோவிலில் புரட்டாசி மாத 5-வது சனிக்கிழமையை முன்னிட்டு இன்று (17.10.2026) சிறப்பு வழிபாடுகள் நடைபெற்றன.

இதையொட்டி அதிகாலை 5 மணிக்கு கோவில் நடை திறக்கப்பட்டு, காலை 6.15 மணிக்கு சிறப்பு திருமஞ்சனம் மற்றும் அலங்கார தீபாராதனை நடைபெற்றது. தொடர்ந்து காலை 7 மணி முதல் 9 மணி வரை 1008 விஷ்ணு சகஸ்ர நாம அர்ச்சனை நடைபெற்றது.

காலை 9.15 மணி முதல் பக்தர்களுக்கு அன்னதானம் வழங்கப்பட்டது. காலை 10 மணிக்கு சிறப்பு பஜனையும், மதியம் 12.15 மணிக்கு சிறப்பு உச்சிகால பூஜையும் நடைபெற்றன.

மதியம் 3 மணி முதல் மாலை 6 மணி வரை கோவில்பட்டி ஸ்ரீ செல்வம் பஜன்ஸ் (திவ்ய நாம சங்கீர்த்தனம்) குழுவினரின் சிறப்பு கோலாட்டம் மற்றும் பஜனை நிகழ்ச்சிகள் நடைபெற்றன.

தொடர்ந்து மாலை 6.30 மணிக்கு அலங்கார தீபாராதனை, பக்தி இன்னிசை மற்றும் இரவு 8.30 மணிக்கு சிறப்பு இரவு பூஜை உள்ளிட்ட நிகழ்ச்சிகள் நடைபெற்றன.

கேரள நம்பூதிரி தலைமையில் சிறப்பு பூஜைகள்!

இவ்விழாவில் சிறப்பு ஹோமம் மற்றும் சிறப்பு பூஜைகளை கேரள மாநிலம் பையனூரைச் சேர்ந்தவரும், சுசீந்திரம் அருள்மிகு ஸ்ரீ தாணுமாலயன் சுவாமி திருக்கோவில் மேல்சாந்தியுமான மஹா ஸ்ரீ கிருஷ்ணன் நம்பூதிரி முன்னின்று நடத்தினார்.

திருக்கோவில் தர்மகர்த்தாவும், சென்னை தொழிலதிபருமான பி.கே. செல்வராஜ் தலைமையில் விழாவிற்கான சிறப்பான ஏற்பாடுகள் செய்யப்பட்டிருந்தன.

புரட்டாசி மாதத்தின் ஒவ்வொரு சனிக்கிழமையும் காலை 6 மணி முதல் இரவு 10 மணி வரை பக்தர்களுக்குப் பிரசாதங்கள் வழங்கப்பட்டு வந்தன.

புரட்டாசி மாதத்தின் கடைசி சனிக்கிழமை என்பதால் சுற்றுவட்டாரப் பகுதிகளைச் சேர்ந்த ஏராளமான பக்தர்கள் குடும்பத்துடன் கோவிலுக்கு வருகை தந்து பெருமாளை வழிபட்டனர்.

படவிளக்கம்: தூத்துக்குடி குறுக்குசாலை  அருகே பூங்காவனம் அருள்மிகு ஸ்ரீ கசங்காத்த பெருமாள் சுவாமி திருக்கோவிலில் புரட்டாசி 5-வது சனிக்கிழமையை முன்னிட்டு நடைபெற்ற சிறப்பு வழிபாட்டில் கலந்துகொண்ட பக்தர்கள்.

படம்: தூத்துக்குடி லீக்ஸ்

Tamil Nadu updates, 

photo news by Arunan Reporter 

அதிமுக 55வது ஆண்டு தொடக்க விழா தூத்துக்குடியில் எம்ஜிஆர் சிலைக்கு தனித்தனி அணியாக மாலை அணிவித்த அதிமுகவினர்!

சண்முகநாதன், செல்லப்பாண்டியன் தலைமையில் தனித்தனியாகக் கொண்டாட்டம் – அதிமுகவினர் மத்தியில் சலசலப்பு!

தூத்துக்குடி, அக். 17:

புரட்சித் தலைவர் எம்ஜிஆர், திமுக தலைமையுடன் ஏற்பட்ட கருத்து வேறுபாட்டைத் தொடர்ந்து கருணாநிதிக்கு எதிராக 1972ஆம் ஆண்டு தொடங்கிய அனைத்திந்திய அண்ணா திராவிட முன்னேற்றக் கழகம், தனது 55வது ஆண்டு தொடக்க விழாவை இன்று கொண்டாடியது.

இதையொட்டி தூத்துக்குடியில் அதிமுகவினர் பட்டாசு வெடித்தும், இனிப்புகள் வழங்கியும் உற்சாகமாகக் கொண்டாடினர். இருப்பினும், கட்சி நிர்வாகிகள் தனித்தனி அணிகளாக வந்து எம்ஜிஆர் சிலைக்கு மாலை அணிவித்த நிகழ்வு அதிமுகவினர் மத்தியில் சலசலப்பை ஏற்படுத்தியது.

மாவட்ட செயலாளர் எஸ் பி சண்முகநாதன் தலைமையில் அதிமுகவினர்

தூத்துக்குடி மாநகர் செயலாளர் சில செல்லப்பாண்டியன் தலைமையில் அதிமுகவினர்....

தூத்துக்குடி பழைய மாநகராட்சி வளாகத்தில் அமைந்துள்ள அதிமுக நிறுவனர் புரட்சித் தலைவர் எம்ஜிஆரின் திருவுருவச் சிலைக்கு, அதிமுக தூத்துக்குடி மாநகரச் செயலாளரும் மாநில வர்த்தக அணிச் செயலாளருமான செல்லப்பாண்டியன் தலைமையில் கட்சியினர் திரளாக வந்து மாலை அணிவித்து மரியாதை செலுத்தினர். தொடர்ந்து பட்டாசுகள் வெடித்தும், பொதுமக்களுக்கும் கட்சித் தொண்டர்களுக்கும் இனிப்புகள் வழங்கியும் கொண்டாடினர்.

இந்நிகழ்ச்சியில் எம்ஜிஆர் மன்றத் துணைச் செயலாளர் ஹென்றி, கழக அமைப்புச் செயலாளர்கள் பெருமாள்சாமி, சின்னத்துரை, மாவட்டப் பொருளாளர் சேவியர், பகுதிச் செயலாளர்கள் ஜெய்கணேஷ், முருகன், சுடலைமணி, எம்ஜிஆர் மன்ற இணைச் செயலாளர் சத்யா, இலட்சுமணன், துணைச் செயலாளர் மிக்கேல், ஏசாதுரை, முன்னாள் மேயர் அந்தோணி கிரேஸி, தமிழரசி, சாந்தி, ராஜேஸ்வரி, சண்முகத்தாய், ஜோதிமணி, நாகூர் பிச்சை, சகாயராஜ், ஆசைத்தம்பி, போக்குவரத்து கல்விக்குமார், இலட்சுமணன், ராஜ்குமார், சுகந்தன், எட்வின் பாண்டியன், சந்தனராஜ் உள்ளிட்ட ஏராளமானோர் கலந்து கொண்டனர்.

இதனைத் தொடர்ந்து அதிமுக தூத்துக்குடி தெற்கு மாவட்டச் செயலாளர் எஸ்.பி. சண்முகநாதன் தலைமையில் மற்றொரு அணியாக அதிமுக நிர்வாகிகள் மற்றும் தொண்டர்கள் திரளாக வந்து, அதே வளாகத்தில் உள்ள எம்ஜிஆர் திருவுருவச் சிலைக்கு மாலை அணிவித்து மரியாதை செலுத்தினர். பின்னர் அனைவருக்கும் லட்டுகள் வழங்கி கட்சியின் ஆண்டு தொடக்க விழாவைக் கொண்டாடினர்.

ஒரே கட்சியின் 55வது ஆண்டு தொடக்க விழாவை முன்னிட்டு, தூத்துக்குடியில் முக்கிய நிர்வாகிகள் இரு தனித்தனி அணிகளாக வந்து எம்ஜிஆர் சிலைக்கு மாலை அணிவித்தது அரசியல் வட்டாரத்தில் கவனத்தை ஈர்த்துள்ளது.

அதிமுகவின் நிறுவன நாளில்கூட நிர்வாகிகள் ஒன்றிணைந்து நிகழ்ச்சியை நடத்தாமல் தனித்தனியாகக் கொண்டாடியது, தூத்துக்குடி அதிமுகவினர் மத்தியில் பேசுபொருளாகியுள்ளது.

 Tamil Nadu updates

 photo news by Arunan journalist 

தூத்துக்குடி, அக். 10

திருப்பரங்குன்றம் மலை உச்சியில் உள்ள தீபத் தூணில் தீபம் ஏற்றத் தமிழக அரசு நடவடிக்கை எடுக்க வேண்டும் என்று வலியுறுத்தி, இந்து முன்னணி சார்பில் தூத்துக்குடியில் மாபெரும் கண்டன ஆர்ப்பாட்டம் நடைபெற்றது.

தூத்துக்குடி டூவிபுரம் 5-வது தெருவில் நடைபெற்ற இந்த ஆர்ப்பாட்டத்திற்கு இந்து முன்னணி மாநில இணை அமைப்பாளர் கே.கே. பொன்னையா தலைமை தாங்கினார். ஆர்ப்பாட்டத்தில், திருப்பரங்குன்றம் மலை மற்றும் அங்குள்ள தீபத் தூண் தொடர்பாக நீதிமன்றம் வழங்கிய தீர்ப்பை உடனே அமல்படுத்த வேண்டும் என முழக்கமிட்டனர்.

இது குறித்து செய்தியாளர்களிடம் பேசிய நிர்வாகிகள், "திருப்பரங்குன்றம் முருகனின் அறுபடை வீடுகளில் முதற்படை வீடாகும். இங்குள்ள மலை உச்சியில் உள்ள தீபத் தூணில் தீபம் ஏற்றும் பாரம்பரிய நடைமுறை பிரிட்டிஷ் ஆட்சிக்காலத்தில் தடை செய்யப்பட்டது. இருப்பினும், லண்டன் பிரைவி கவுன்சில் இந்துக்களுக்கு ஆதரவாகத் தீர்ப்பு அளித்தது. இதுதொடர்பாக 1923 முதல் 2026 வரை பல்வேறு வழக்குகள் நீதிமன்றத்தில் நடைபெற்று வந்தன.

இறுதியாக, தர்கா உள்ள பகுதி நீங்கலாக மலை முழுவதுமே முருகனுக்கே சொந்தம் என்றும், மலை உச்சியில் உள்ள தீபத் தூணில் தீபம் ஏற்றலாம் என்றும் நீதிமன்றம் உத்தரவிட்டது. 

ஆனால், முந்தைய திமுக அரசு இந்த தீர்ப்பை மதிக்காமல் தீபம் ஏற்ற வந்தவர்கள் மீது அடக்குமுறையை ஏவியது. தற்போது உள்ள தற்போதைய அரசும் அந்தப் பாதையிலேயே சென்று, உச்சநீதிமன்றத்தில் மேல்முறையீடு செய்துள்ளது. இது முருக பக்தர்களை வஞ்சிக்கும் செயலாகும். எனவே, நீதிமன்றத் தீர்ப்பின்படி திருப்பரங்குன்றம் மலை உச்சியில் தீபம் ஏற்றத் தமிழக அரசு உரிய நடவடிக்கை எடுக்க வேண்டும்," என்று வலியுறுத்தினர்.

இந்த ஆர்ப்பாட்டத்தில் மாநகர மாவட்ட தலைவர் வழக்கறிஞர் இசக்கி முத்து குமார் திருச்செந்தூர் மாவட்ட தலைவர்  முத்துராஜ் மாநில மாவட்ட செயற்குழு உறுப்பினர்கள் சரவணகுமார், பலவேசம், கவியரசு மற்றும் பெருந்திரளான முருக பக்தர்கள் மற்றும் இந்து முன்னணி நிர்வாகிகள், தொண்டர்கள் கலந்து கொண்டனர். இந்தப் போராட்டம் காரணமாக அப்பகுதியில் சிறிது நேரம் பரபரப்பு நிலவியது.

 தூத்துக்குடி அக் 10

தமிழக மீன்வளத்துறை அமைச்சர் ஸ்ரீநாத்தை ஜாதிய அடிப்படையில் ஒரு சிலர் கட்டுப்பாட்டுக்குள் வைத்துக் கொண்டு செயல்படுவதாகவும் நாடார் சமுதாயத்திற்கு உரிய பிரதிநிதித்துவம் தென் மாவட்டத்தில் இல்லாததால் தங்களது குறைகளை சொல்ல முடியாத நிலை ஏற்பட்டுள்ளது 

எனவே ஸ்ரீவைகுண்டம் தமிழக வெற்றி கழக எம்எல்ஏ சரவணனுக்கு அமைச்சர் பதவி வழங்க வேண்டும் என நாடார் இயக்கங்களின் கூட்டமைப்பு கோரிக்கை, நாடார் சமுதாயத்திற்கு உரிய பிரதிநிதித்துவம் வழங்காவிட்டால் தமிழக வெற்றி கழகத்திற்கு எதிராக ஒட்டுமொத்த நாடார் சமுதாயமும் திரும்பும் என எச்சரிக்கை.

இது பற்றிய செய்தியாவது :-

தூத்துக்குடியில் நாடார் இயக்கங்களின் கூட்டமைப்பு சார்பில் வழக்கறிஞர் சிலுவை செய்தியாளர்களை சந்தித்தார். அப்போது அவர் கூறுகையில்,

நடந்து முடிந்த இரண்டு சட்டமன்ற தொகுதி இடைத்தேர்தல் வெற்றி கழகம் வெற்றி பெற்றதற்கு வாழ்த்துக்களை தெரிவித்துக் கொள்கிறோம் சிறந்த நிர்வாகத்தை செயல்படுத்தி வரும் தமிழக முதல்வரை பாராட்டுகிறோம் என தெரிவித்தனர். 

ஆனால் அதே நேரத்தில் தமிழக வெற்றிக்கழக ஆட்சியில் தமிழகத்தில் நாடார் சமுதாயம் பெரும்பான்மையாக இருக்கும் தூத்துக்குடி மாவட்டத்தில் புறக்கணிக்கப்படும் நிலை ஏற்பட்டுள்ளது தூத்துக்குடி சட்டமன்ற தொகுதியில் வெற்றி பெற்று அமைச்சராக ஆகியிருக்கும் தமிழக மீன்வளத்துறை அமைச்சர் ஸ்ரீநாத் ஜாதி மத வேறுபாடு இன்றி செயல்பட்டு வருகிறார். 

ஆனால் அவரை சுற்றி இருக்கும் ஒரு குறிப்பிட்ட ஒரு சமுதாயத்தைச் சேர்ந்தவர்கள் அவரை ஒரு ஜாதி வட்டத்திற்குள் அடைக்கும் வகையில் சமூக வலைதளங்களில் பல்வேறு கருத்துக்களை வெளியிட்டு வருகின்றனர். 

தூத்துக்குடி மாவட்டத்தில் தென் மாவட்டத்தில் பெரும்பான்மையாக இருக்கும் நாடார் சமுதாய மக்களின் அரசியல் முடிந்துவிட்டது. 

இனி எங்கள் சமுதாய கொடி தான் பறக்கும் என சமூக வலைதளங்களில் செய்திகள் பரப்பப்பட்டு வருகிறது இனிமேல் அனைத்து பதவிகளும் எங்கள் சமுதாயத்திற்கு தான் என கருத்துக்கள் பரப்பப்படுகின்றன. 

மேலும் தூத்துக்குடி மாவட்டத்தில் 6 சட்டமன்ற தொகுதிகளில் நாடார் சமுதாயத்தைச் சேர்ந்த பலருக்கு பதவி இல்லாமல் உள்ளது. மேலும் தமிழக வெற்றிக்கழக ஆட்சியில் நாடார் சமுதாயத்தைச் சேர்ந்தவர்களுக்கு உரிய பிரதிநிதித்துவம் அளிக்கப்படாததால் எங்கள் குறைகளை சொல்ல முடியாத நிலை ஏற்பட்டுள்ளது எனவே விகிதாசார அடிப்படையில் கூடுதலாக அமைச்சர் பதவி வழங்க வேண்டும் ஸ்ரீவைகுண்டம் சட்டமன்ற தொகுதியில் வெற்றி பெற்று உள்ள தமிழக வெற்றிக் கழக எம்எல்ஏ சரவணனுக்கு அமைச்சர் பதவி வழங்க நடவடிக்கை எடுக்க வேண்டும். 

தொடர்ந்து தமிழக வெற்றிக்கழக ஆட்சியில் நாடார் சமுதாயம் புறக்கணிக்கபடுவது போல் தெரிகிறது எனவே இதற்கு தமிழக முதல்வர் ஜோசப் விஜய் உரிய நடவடிக்கை எடுக்க விட்டால் ஒட்டுமொத்த நாடார் சமுதாயமும் தமிழக வெற்றிக்கழக அரசுக்கு எதிராகவும் தமிழக வெற்றி கழகத்திற்கு எதிராகவும் திரும்பும் சூழ்நிலை ஏற்படும் எனவே இந்த விஷயத்தில் தமிழக முதல்வர் உடனடியாக நாடார் இயக்கங்களை சேர்ந்தவர்களை சந்தித்து உரிய நடவடிக்கை எடுக்க வேண்டுமென தெரிவித்தனர்.

Tamil Nadu update 

photo news by Arunan journalist 

தூத்துக்குடி மாவட்ட அரசியலில் மீண்டும் தலைதூக்கும் சமூக பிரதிநிதித்துவக் கோரிக்கைகள்!!!

! சமூக வலைதளங்களில் பரவும் இருவேறு கருத்துகளால் புதிய விவாதம்!

தூத்துக்குடி, அக். 11:

சிறப்புக் கட்டுரை | தூத்துக்குடி லீக்ஸ்

தூத்துக்குடி மாவட்ட அரசியலில் சமூக பிரதிநிதித்துவம் குறித்த விவாதங்கள் மீண்டும் பேசுபொருளாகியுள்ளன. குறிப்பாக, தமிழக வெற்றிக் கழக ஆட்சியில் தூத்துக்குடி மாவட்டத்தைச் சேர்ந்த இரண்டு சட்டமன்ற உறுப்பினர்களுக்கு அமைச்சர் பதவி வழங்கப்பட்டுள்ள நிலையில், ஸ்ரீவைகுண்டம் சட்டமன்ற உறுப்பினர் சரவணனுக்கும் அமைச்சர் பதவி வழங்க வேண்டும் என்ற கோரிக்கை தற்போது சமூக வலைதளங்களில் ஒலிக்கத் தொடங்கியுள்ளது.

ஆறு தொகுதிகள்... பல்வேறு சமூகங்கள்!

தூத்துக்குடி மாவட்டத்தில்  விளாத்திகுளம், கோவில்பட்டி, ஓட்டப்பிடாரம், தூத்துக்குடி, திருச்செந்தூர், ஸ்ரீவைகுண்டம் என ஆறு சட்டமன்றத் தொகுதிகள் உள்ளன.

ஒவ்வொரு தேர்தலின்போதும் அந்தந்தத் தொகுதிகளில் குறிப்பிட்ட இரண்டு அல்லது மூன்று சமூகங்களின் வாக்குகளே வெற்றி, தோல்வியை நிர்ணயிப்பதாக அரசியல் கட்சியினர் மத்தியில் கணக்குகள் முன்வைக்கப்படுவது வழக்கம்.

உதாரணமாக, விளாத்திகுளம் தொகுதியில் நாயக்கர், -ரெட்டியார் சமூகத்தினரின் வாக்குகள் குறித்தும், கோவில்பட்டி தொகுதியில் தேவர், நாயக்கர் சமூகத்தினரின் வாக்குகள் குறித்தும் தூத்துக்குடி பரதர் -வேளாளர் -நாடார் என அரசியல் கணக்குகள் பேசப்படுகின்றன.

ஆனால், தூத்துக்குடி மாவட்டத்தை ஒட்டுமொத்தமாக எடுத்துக்கொண்டால், எந்தவொரு சமூகத்தையும் மட்டுமே பெரும்பான்மை சமூகமாகக் கருதி அரசியல் கணக்குகளை வகுத்துவிட முடியாது. அனைத்து சமூக மக்களும் மாவட்டத்தின் பல்வேறு பகுதிகளில் பரவலாக வாழ்ந்து வருகின்றனர் என்பதே கள நிலவரம்.

அரசியல் கட்சிகளின் கடந்தகால அணுகுமுறை!

கடந்த காலங்களில் காங்கிரஸ், பாரதிய ஜனதா கட்சி, கம்யூனிஸ்ட் உள்ளிட்ட தேசியக் கட்சிகள் வேட்பாளர் தேர்வு மற்றும் மாவட்ட செயலாளர் நிர்வாகிகள் நியமனங்களில் பல்வேறு சமூகங்களைச் சேர்ந்தவர்களுக்கும் வாய்ப்பளித்து வந்தன.

அதேநேரத்தில், தமிழகத்தின் பிரதான அரசியல் கட்சிகளான திமுக, அதிமுக ஆகியவை ஆளும் கட்சியான பின் 1980-களிலிருந்து தூத்துக்குடி மாவட்ட அரசியலில் நாடார் சமூகத்தைச் சேர்ந்தவர்களுக்கு மாவட்டச் செயலாளர், சட்டமன்ற உறுப்பினர், நாடாளுமன்ற உறுப்பினர் உள்ளிட்ட முக்கியப் பொறுப்புகளில் நாடார் சமூகத்திற்கு  வாய்ப்பளித்து வந்ததாக அரசியல் வட்டாரங்களில் கருத்து நிலவுகிறது.

இதன் காரணமாக, தங்களது சமூகத்திற்கும் உரிய அரசியல் பிரதிநிதித்துவம் வழங்கப்பட வேண்டும் என்ற கோரிக்கையைப் பரதர் சமூக அமைப்புகள் தொடர்ந்து முன்வைத்து வந்ததாகக் கூறப்படுகிறது.

பரதர் சமூகத்தின் நீண்டகால அரசியல் எதிர்பார்ப்பு!

தூத்துக்குடி நகரின் வரலாற்றில் மறக்க முடியாத ஆளுமையாக விளங்கியவர் ராவ் பகதூர் குரூஸ் பர்னாந்து.

தூத்துக்குடி நகராட்சித் தலைவர் பொறுப்பை 17 முறை வகித்த பெருமைக்குரிய இவர், தூத்துக்குடி நகர மக்களுக்குக் குடிநீர் வசதியை ஏற்படுத்திக் கொடுத்ததற்காக இன்றளவும் மக்களால் போற்றப்பட்டு வருகிறார்.

அவருக்குப் பின்னர் பரதர் சமூகத்தைச் சேர்ந்தவர்களுக்கு தூத்துக்குடி மாவட்ட அரசியலில் உரிய முக்கியத்துவம் வழங்கப்படவில்லை என்ற ஆதங்கம் அந்தச் சமூக அமைப்புகள் மத்தியில் நீண்டகாலமாக இருந்து வந்துள்ளது.

குறிப்பாக, திமுக, அதிமுக உள்ளிட்ட பிரதான கட்சிகளில் மாவட்டச் செயலாளர் மற்றும் முக்கியப் பொறுப்புகளோ, சட்டமன்றத் தேர்தல்களில் போட்டியிடுவதற்கான வாய்ப்புகளோ தங்கள் சமூகத்தினருக்கு உரிய அளவில் வழங்கப்படுவதில்லை என்ற குற்றச்சாட்டுகளையும் கோரிக்கைகளையும் பரதர் சமூக அமைப்புகள் முன்வைத்து வந்ததாகக் கூறப்படுகிறது.

தமிழக வெற்றிக் கழகத்தின் வெற்றி ஏற்படுத்திய மாற்றம்!

இந்தச் சூழலில், கடந்த இரண்டு ஆண்டுகளுக்கு முன்பு அரசியல் கட்சியைத் தொடங்கிய விஜய் தலைமையிலான தமிழக வெற்றிக் கழகம், தூத்துக்குடி சட்டமன்றத் தொகுதியில் பரதர் சமூகத்தைச் சேர்ந்தவரும் விஜய்யின் நண்பருமான ஸ்ரீநாத்துக்கு வாய்ப்பளித்தது.

தேர்தலில் ஸ்ரீநாத் வெற்றி பெற்றது பரதர் சமூக அமைப்புகள் மத்தியில் பெரும் வரவேற்பைப் பெற்றது. பல்வேறு அமைப்புகள் வெற்றிக் கொண்டாட்டங்களில் ஈடுபட்டதுடன், தமிழக முதல்வர் விஜய்க்கும் நன்றி தெரிவித்தன.

அனைத்துச் சமூக மக்களையும் சமமாகக் கருதி அரசியல் வாய்ப்புகளை வழங்க வேண்டும் என்ற நிலைப்பாட்டுடன் தமிழக வெற்றிக் கழகம் செயல்பட்டு வருவதாக அக்கட்சியினர் தெரிவித்து வருகின்றனர்.

ஒரே மாவட்டத்தில் இரண்டு அமைச்சர்கள்!

தமிழக வெற்றிக் கழக ஆட்சியில் தூத்துக்குடி மாவட்டத்தைச் சேர்ந்த ஓட்டப்பிடாரம் சட்டமன்ற உறுப்பினர் மதன் ராஜாவுக்கும், தூத்துக்குடி சட்டமன்ற உறுப்பினர் ஸ்ரீநாத்துக்கும் அமைச்சர் பதவி வழங்கப்பட்டுள்ளது.

இதில் தலித் சமூகத்தைச் சேர்ந்த மதன் ராஜாவுக்கும், பரதர் சமூகத்தைச் சேர்ந்த ஸ்ரீநாத்துக்கும் ஒரே மாவட்டத்தில் அமைச்சர் பதவி வழங்கப்பட்டிருப்பது அரசியல் முக்கியத்துவம் வாய்ந்ததாகப் பார்க்கப்படுகிறது.

இந்நிலையில், கடந்த சில வாரங்களாகப் பரதர் சமூக நலன் மற்றும் அரசியல் பிரதிநிதித்துவம் தொடர்பான பல்வேறு பதிவுகள் சமூக வலைதளங்களில் பரவி வருகின்றன.

இதன் தொடர்ச்சியாக, தமிழக வெற்றிக் கழக ஆட்சியில் நாடார் சமூகத்தினருக்கு உரிய முக்கியத்துவம் வழங்கப்படவில்லை என்ற கருத்துகளும் சமூக வலைதளங்களில் எழத் தொடங்கியுள்ளன.

தூத்துக்குடியில் நாடார் சமுகத்திற்கு முக்கியத்துவம் வழங்க வேண்டும் சிறுவைகுண்ட எம்எல்ஏ சரவனண் -க்கு அமைச்சர் பதவி வழங்க வேண்டும் என நாடார் கூட்டமைப்பு வழக்கறிஞர் சிலுவை நாடார் பரபரப்பு பிரஸ் மீட்

ஸ்ரீவைகுண்டம் சரவணனுக்கும் அமைச்சர் பதவி வேண்டும்!

தூத்துக்குடி மாவட்டத்தில் ஏற்கெனவே இரண்டு சமூகங்களைச் சேர்ந்த சட்டமன்ற உறுப்பினர்களுக்கு அமைச்சர் பதவி வழங்கப்பட்டுள்ள நிலையில், நாடார் சமூகத்தைச் சேர்ந்த ஸ்ரீவைகுண்டம் சட்டமன்ற உறுப்பினர் சரவணனுக்கும் அமைச்சர் பதவி வழங்க வேண்டும் என்ற கோரிக்கை தற்போது முன்வைக்கப்பட்டு வருகிறது.

நாடார் சமூக அமைப்புகள் சார்பில் இத்தகைய கோரிக்கைகள் எழுந்து வருவதாகவும், சமூக வலைதளங்களில் இதுதொடர்பான கருத்துகள் பகிரப்பட்டு வருவதாகவும் கூறப்படுகிறது.

ஒரே மாவட்டத்தில் இரண்டு அமைச்சர்கள் இருக்கும்போது மூன்றாவதாக ஒருவருக்கு அமைச்சர் பதவி வழங்கப்படுமா? சமூக பிரதிநிதித்துவக் கோரிக்கைகளுக்கு முதல்வர் விஜய் எத்தகைய முடிவை எடுக்கப் போகிறார்? என்ற கேள்விகளும் அரசியல் வட்டாரங்களில் எழுந்துள்ளன.

சமூகப் பிரதிநிதித்துவமா? சமூகங்களுக்கு இடையிலான போட்டியா?

ஜனநாயக அரசியலில் அனைத்துச் சமூக மக்களுக்கும் உரிய பிரதிநிதித்துவம் கிடைக்க வேண்டும் என்ற எதிர்பார்ப்பு இயல்பான ஒன்றுதான்.

ஆனால், ஒரு சமூகத்திற்கு வழங்கப்படும் அரசியல் வாய்ப்பை மற்றொரு சமூகத்திற்கான புறக்கணிப்பாகச் சித்தரிக்கும் போக்கு ஆரோக்கியமான அரசியலுக்கு வழிவகுக்குமா என்பதும் சிந்திக்க வேண்டிய கேள்வியாகும்.

குறிப்பாக, கடந்த சில வாரங்களாகத் தூத்துக்குடி மாவட்ட அரசியல் தொடர்பாக சமூக வலைதளங்களில் இருவேறு கருத்துகள் பரவலாகப் பகிரப்பட்டு வருவது சமூக ஆர்வலர்கள் மத்தியில் கவலையை ஏற்படுத்தியுள்ளது.

அரசியல் பதவிகள் என்பது ஒரு குறிப்பிட்ட சமூகத்திற்கான அங்கீகாரமாக மட்டும் பார்க்கப்படாமல், அனைத்து மக்களுக்கும் சேவையாற்றுவதற்கான பொறுப்பாகப் பார்க்கப்பட வேண்டும்.

தூத்துக்குடி மாவட்டத்தின் பலமே பல்வேறு சமூக மக்கள் ஒற்றுமையுடன் வாழ்வதுதான். அந்த ஒற்றுமையை அரசியல் பதவிகளுக்கான போட்டிகள் சிதைத்துவிடக் கூடாது என்பதே சமூக அக்கறை கொண்டவர்களின் எதிர்பார்ப்பாக உள்ளது.

இதுவும் கடந்து போகும் என்ற மனநிலைக்கு மக்கள் தள்ளப்பட்டுள்ள நிலையில், சமூகங்களைக் கடந்து மக்கள் நலனை முன்னிறுத்தும் அரசியலே தூத்துக்குடி மாவட்டத்தின் இன்றைய தேவையாக இருக்கிறது!

– தூத்துக்குடி லீக்ஸ் சிறப்புக் கட்டுரை

Tamil Nadu updates 

photo news by Arunan journalist 

தூத்துக்குடியில் வொண்டர் டைமண்ட்ஸ் புதிய கிளை திறப்பு விழா!

அமைச்சர்கள் ஸ்ரீநாத், மதன் ராஜா குத்துவிளக்கேற்றி தொடங்கி வைத்தனர்

தூத்துக்குடி, அக். 10:

தூத்துக்குடியில் உலகப் புகழ்பெற்ற வைர நகை நிறுவனமான வொண்டர் டைமண்ட்ஸ் நிறுவனத்தின் புதிய கிளை திறப்பு விழா இன்று பிரமாண்டமாக நடைபெற்றது.

இந்த விழாவில் ...

அமைச்சர்கள் ஸ்ரீநாத், மதன் ராஜா ஆகியோர் சிறப்பு விருந்தினர்களாகக் கலந்து கொண்டு குத்துவிளக்கேற்றி புதிய கிளையைத் தொடங்கி வைத்தனர்.

விழாவில்... வொண்டர் டைமண்ட்ஸ் நிறுவனத் தலைவர் விஸ்வநாதன் மற்றும் அந்நிறுவனக் குழுமத்தைச் சேர்ந்த அனிருத், ஐஸ்வர்யா, சௌந்தர்யா லட்சுமி ஆகியோர் கலந்து கொண்டு சிறப்பு விருந்தினர்களை வரவேற்றனர். 

தொடர்ந்து, அமைச்சர்கள் விற்பனையைத் தொடங்கி வைத்தனர்.

நிகழ்ச்சியில் பேசிய அமைச்சர்கள் ஸ்ரீநாத், மதன் ராஜா ஆகியோர், வைர நகைகளின் பயன்பாடு மற்றும் சிறப்புகள் குறித்துப் பேசினர். மேலும், உலகப் புகழ்பெற்ற நிறுவனமாக விளங்கும் வொண்டர் டைமண்ட்ஸ் நிறுவனத்தின் நம்பகத்தன்மை, நேர்மை, வணிகப் பெருமை மற்றும் வாடிக்கையாளர்களிடம் பெற்றுள்ள நன்மதிப்பு குறித்தும் எடுத்துரைத்தனர்.

இந்தப் புதிய கிளையின் தொடக்க விழாவில் நிறுவனத்தின் நிர்வாகிகள், ஊழியர்கள் மற்றும் வாடிக்கையாளர்கள் உள்ளிட்டோர் கலந்து கொண்டனர்.

நிகழ்ச்சியின் நிறைவில் நிறுவன மேலாளர் நிகில் நன்றியுரை வழங்கினார்.