முன்னாள் முதல்வர் காமராஜரின் பிறந்த நாளையொட்டி புத்தகத் தானம்

தூத்துக்குடி, ஜூலை 14

முன்னாள் தமிழக முதல்வரும் கல்விக்குத் தொண்டளித்தவருமான காமராஜரின் பிறந்த நாளை முன்னிட்டு, தூத்துக்குடி தூய இஞ்ஞாசியார் மேல் நிலைப் பள்ளி நூலகத்திற்கு புத்தகத் தானம் வழங்கும் நிகழ்வு இடம்பெற்றது.

பள்ளிகள் மற்றும் கிராமப்புற நூலகங்களுக்கு புத்தகங்கள் வழங்கும் நோக்கில், தூத்துக்குடி மாவட்ட புத்தக வாசிப்பு நற்பணி மன்றம் மற்றும் தூத்துக்குடி மாவட்ட காமராஜர் நற்பணி மன்றம் இணைந்து இந்நிகழ்வை ஒருங்கிணைத்தன.

அழைப்பு!!!

இந்நிகழ்வுக்காக பொதுமக்கள், பெற்றோர்கள் மற்றும் மாணவ மாணவிகளிடம் நல்ல எழுத்தாளர்கள் எழுதிய புத்தகங்களை தானமாக வழங்குமாறு அழைப்பு விடுக்கப்பட்டது. 

உதவி!!!

அந்த அழைப்புக்கு ஆதரவளித்து, ஆசிரியர் வள்ளிநாயகி மற்றும் கவிஞர் செல்வராஜ் ஆகியோர் புதிய புத்தகங்களை வாங்கி கொடுத்து உதவினர்.

இவ்வாறு சேகரிக்கப்பட்ட புத்தகங்களை, தூய இஞ்ஞாசியார் மேல் நிலைப் பள்ளி நூலகத்திற்கு, தலைமை ஆசிரியர் ஜேசு அந்தோணி மற்றும் ஆசிரியர் ராஜ்குமாரிடம், புத்தக வாசிப்பு நற்பணி மன்றம் சார்பில் மாரிமுத்து மற்றும் காமராஜர் நற்பணி மன்றம் சார்பில் லாரன்ஸ் ஆகியோர் வழங்கினர்.

நிகழ்வில் ஆசிரியர்கள் நியூட்டன் மற்றும் செல்வின் உள்ளிட்டோர் கலந்து கொண்டு சிறப்பித்தனர்.