தூத்துக்குடி மாநகராட்சி நிர்வாகம் மாநகரில் சாலையோரம் நிறுத்தும் வாகனங்களுக்கு ரூ 5 ரூ 10 கட்டண வசூல் செய்யும் தீர்மானத்தை வாபஸ் பெறவேண்டும்..! மத்திய மாவட்ட சமத்துவ மக்கள் கட்சி வலியுறுத்தல்..!!

 

தூத்துக்குடி மாநகராட்சி மாநகரில் சாலையோரங்களில் நிறுத்தப்படும் வாகனங்களூக்கு ரூபாய் 5 ரூபாய் 10  என  கட்டணம் வசூலிக்கும் தீர்மானத்தை உடனடியாக திரும்பபெறவேண்டும், இல்லாதபட்சத்தில் மாநகராட்சி அலுவலகம் முன்பு மாபெரும் போராட்டம் நடத்தப்படும் என்று அகில இந்திய சமத்துவ மக்கள் கட்சி அறிவித்துள்ளது.

 

இதுகுறித்து, அகில இந்திய சமத்துவ மக்கள் கட்சியின் தூத்துக்குடி மத்திய மாவட்ட செயலாளர் எம்.எக்ஸ்.வில்சன் அறிக்கை வெளியிட்டுள்ளார்.

தூத்துக்குடி மத்திய மாவட்ட செயலாளர் எம்.எக்ஸ்.வில்சன்

 தூத்துக்குடி மாநகராட்சியாக தரம் உயர்த்தப்பட்டு 10ஆண்டுகளை கடந்தும், மாநகராட்சியில் மக்களுக்கான அடிப்படைத்தேவைகள் இன்றுவரை பூர்த்தியாகவில்லை.

 

சிறு மழை பெய்தாலே மாநகரம் முழுவதும் மழைநீர் குளம் போல தேங்கி விடுகிறது. மழைக்காலத்தில் தூத்துக்குடி மாநகரமே கடலில் மிதக்கும் கப்பலாக தத்தளிப்பது காலகாலமாக தொடர்கிறது. இப்படி இருக்க தற்போது 'ஸ்மார்ட் சிட்டி' என்ற பெயரில் மாநகரமே இன்று அலங்கோலமாக காட்சி அளித்து வருகிறது.

 

சீரான போக்குவரத்திற்கு ஏற்ப போதுமான சாலை வசதிகள் இல்லாததால் மாநகரமே தினம் தினம் போக்குவரத்து நெருக்கடியில் சிக்கி தவித்து வருகிறது.

இப்படிப்பட்ட சூழலில், கடந்த 30.05.2022 அன்று திமுக மேயர் ஜெகன்பெரியசாமி தலைமையிலான மாநகராட்சி கூட்டத்தில், ''மாநகராட்சி பகுதிகளிலுள்ள சாலையோரங்களில் நிறுத்தப்படும் வாகனங்களுக்கு ... கட்டணம் வசூலிக்கும் தீர்மானம்'' நிறைவேற்றப்பட்டுள்ளது . தூத்துக்குடி பொதுமக்கள் அனைவருக்கும் மிகப்பெரும் அதிர்ச்சி அளித்து இருக்கிறது.

 

சாலைகளே சரியாக இல்லாத நிலையில், தங்களை நம்பி வாக்களித்த மாநகர மக்களுக்கு அன்பு பரிசாக திமுக தலைமையிலான மாநகராட்சி நிர்வாகம் மாநகரில் சாலையோரங்களில் வழக்கம் போல் இடது புறமாக நிறுத்தப் படும்  வாகனங்களுக்கு கூட கட்டணம் வசூலிக்கும் திட்டத்தை செயல்படுத்த முயற்சி ப்பது வெட்ககேடான செயலாகும்.

 

தூத்துக்குடி மாநகரை பொறுத்தவரை  பொதுமக்கள் கடைகளுக்கு பொருட்களை வாங்க செல்லும் மக்கள், வியாபாரிகள், தனியார் வணிக வளாகங்களில் பணிபுரிபவர்கள், திருமணம் உள்ளிட்ட நிகழ்வுகளுக்கு செல்பவர்கள், தொழிலாளர்கள் என பெரும்பாலானவர்கள் முக்கிய சாலையின் இடது புறங்களில் தான் வாகனங்களை நிறுத்தி செல்கின்றனர்.

 

இப்படி நிறுத்தப்படும் வாகனங்களால் விபத்துக்கள் ஏற்பட்டதாக இதுவரை தகவல் இல்லை. ஆனால், மாநகராட்சி நிர்வாகமோ சாலையோரங்களில் நிறுத்தப்படும் பைக், கார் போன்ற வாகனங்களால் தான் விபத்துக்கள் ஏற்படுகிறது என்றும் அதனை தவிர்க்கத்தான் இந்த பார்க்கிக் கட்டணம் வசூலிக்கும் திட்டத்தை கொண்டு வந்துள்ளதாக அறிவித்துள்ளது முழு பூசணிக்காயை சோற்றில் மறைக்கும் செயலாகவே தெரிகிறது.

அப்படி பார்த்தால் தினம் வெறும் ரூ 10 கட்டணமாக செலுத்தி விட்டு நான்கு சக்கர வாகனம் (கார்)ஒட்டு வோர் அநேகம் பேர் சாலையோரங்களில் நிறுத்திவிட்டு சென்று விடுவார்கள் கார்கள் சாலைகளில் நிற்பதால் போக்கு வரத்து நெரிசல் உண்டாகும் இதே போல் ரூ 50 கட்டண செலுத்தி விட்டு லாரி போன்ற கனரக வாகனங்கள் அங்காங்கே சாலையோரங்களில் நிறுத்தினாலும் போக்குவரத்து நெரிசல் தான் ஏற்படுத்தும் என்பது அனைவருக்கும் புரியும்.

 

இதனால் வணிகர்கள், விவசாயிகள், தொழிலாளர்கள், பெண்கள், பணியாளர்கள், பொதுமக்கள் என அனைத்துதரப்பினரையும் பாதிக்கும் இந்த பார்க்கிங் கட்டணம் வசூலிக்கும் தீர்மானத்தை மாநகராட்சி நிர்வாகம் உடனடியாக திரும்ப பெறவேண்டும் என்று அகில இந்திய சமத்துவ மக்கள் கட்சி சார்பில் வலியுறுத்தி கேட்டுக்கொள்கிறோம்.

 

இல்லாதபட்சத்தில் எங்கள் கட்சியின் நிறுவன தலைவரும், பொதுச்செயலாளருமான ''புரட்சி திலகம்'' ரா.சரத்குமார்  ஆலோசனையின் பேரில், மாநில துணை பொதுச்செயலாளர் என்.சுந்தர் வழிகாட்டுதல்படி வணிகர்கள், தொழிலாளர்கள் மற்றும் பொதுமக்கள் என அனைவரையும் ஒன்றுதிரட்டி மாநகராட்சி அலுவலகத்தை முற்றுகையிட்டு மாபெரும் போராட்டம் நடத்தப்படும் என்று தெரிவித்தார்கள்..