thoothukudileaks daily news
Tamil Nadu updates
photo news by Arunan Reporter
தூத்துக்குடி மேலூர் ரயில் நிலையத்தில் அடிப்படை வசதிகளை விரைந்து அமைக்க ‘போர்ட்சிட்டி வெல்ஃபேர் அசோசியேஷன்’ கோரிக்கை!
தூத்துக்குடி: செப் 28
தூத்துக்குடி மேலூர் ரயில் நிலையத்தில் பயணிகளுக்கான அடிப்படை வசதிகளை உடனடியாக செய்து தரக் கோரி, 'போர்ட்சிட்டி வெல்ஃபேர் அசோசியேஷன்' சார்பாக கீழூர் ரயில் நிலைய முதன்மை வணிக ஆய்வாளருக்கு மனு அனுப்பப்பட்டுள்ளது.
இது குறித்து போர்ட்சிட்டி வெல்ஃபேர் அசோசியேஷன் தலைவர் . D. கணேசன், செயலாளர் . K. சண்முகவேல் மற்றும் பொருளாளர் . M. கணேசன் ஆகியோர் வெளியிட்டுள்ள அறிக்கையில் கூறியிருப்பதாவது:
"கடந்த ஜனவரி 2026 முதல் தூத்துக்குடி கீழூர் ரயில் நிலையத்திலிருந்து புறப்படும் பெரும்பாலான ரயில்கள், மேலூர் ரயில் நிலையத்திலும் நின்று பயணிகளை ஏற்றிச் செல்கின்றன.
ரயில்வே நிலையம் தூத்துக்குடி புதிய பேருந்து நிலையத்திற்கு எதிரேயும், நகரின் மையப்பகுதியிலும் அமைந்துள்ளதால், பொதுமக்களுக்கும் பயணிகளுக்கும் மிகவும் பயனுள்ளதாக உள்ளது.
பெரும்பாலான பயணிகள் நேரத்தையும் பணத்தையும் மிச்சப்படுத்த மேலூர் நிலையத்தையே பயன்படுத்துகின்றனர்.
அதிகாலை முதல் நள்ளிரவு வரை ரயில்கள் இயங்குவதால், நாள் முழுவதும் பயணிகள் நடமாட்டம் மிகுந்த முக்கிய இடமாக இந்நிலையம் விளங்கி வருகிறது. ஆனால், இங்கு பயணிகளுக்குத் தேவையான அடிப்படை வசதிகள் இன்னும் முழுமையாக செய்து தரப்படவில்லை.
எனவே, பயணிகள் நலன் கருதி பின்வரும் கோரிக்கைகளை உடனடியாக நிறைவேற்ற வேண்டும் என வலியுறுத்துகிறோம்:
- கழிவறை வசதி: பயணிகள் பயன்பாட்டிற்கான சுகாதாரமான கழிவறைகளை அமைக்க வேண்டும்.
- சிற்றுண்டி உணவகம்: சிறிய அளவிலான தேநீர் மற்றும் சிற்றுண்டிக் கடை அமைக்கப்பட வேண்டும்.
- முழுநேர டிக்கெட் கவுண்டர்: முன்பதிவு செய்வதற்கான இணையதள வசதியுடன் கூடிய முழுநேர பயணச்சீட்டு மையத்தை இயக்க வேண்டும்.
- நிழற்கூரை (Passenger Shed): வெயில் மற்றும் மழையிலிருந்து பயணிகளைப் பாதுகாக்க நடைமேடை முழுவதும் கூரை அமைக்க வேண்டும்.
- குடிநீர் வசதி: பயணிகள் பயன்பாட்டிற்கு சுத்திகரிக்கப்பட்ட குடிநீர் வசதி செய்து தர வேண்டும்.
- மேம்பாலப் பணியை விரைவுபடுத்துதல்: நடைமேடை 1 மற்றும் 2-ஐ இணைக்கும் 'நடைமேம்பால' (Passenger Foot Bridge) பணி மிகவும் மெதுவாக நடைபெற்று வருகிறது. இந்த வேலையை விரைவுபடுத்தி உடனடியாக மக்கள் பயன்பாட்டிற்கு கொண்டு வர வேண்டும்.
இது தொடர்பாக கடந்த மார்ச் (06.03.2026) மற்றும் மே (29.05.2026) ஆகிய மாதங்களில் ஏற்கனவே கடிதம் அனுப்பியும், 5 மாதங்களுக்கு மேலாக ரயில்வே நிர்வாகத்திடமிருந்து எந்தவித பதிலும் வராதது மிகுந்த ஏமாற்றத்தையும் வருத்தத்தையும் அளிக்கிறது.
எனவே, ரயில்வே நிர்வாகம் இனியும் காலதாமதம் செய்யாமல், மேலூர் ரயில் நிலையப் பயணிகளின் நலன் கருதி மேற்கண்ட கோரிக்கைகள் மீது உடனடியாக நடவடிக்கை எடுக்க வேண்டும்" என தெரிவித்துள்ளனர்.
 |
| model photo |
இக்கோரிக்கையின் நகல் தென்னக ரயில்வேயின் மதுரை கோட்ட மேலாளருக்கும் (Divisional Railway Manager - DRM) அனுப்பப்பட்டுள்ளது
செய்தி புகைப்படத்தில் செயற்கை தொழில்நுட்பம் பயன்படுத்தப்பட்டுள்ளது.
.
கருத்துகள் இல்லை:
கருத்துரையிடுக