எஸ்.ஐ.ஆர் பணிகள் புறக்கணிப்பு : திமுக அரசின் திட்டமிட்ட சதி – வருவாய்த்துறை ஊழியர்கள் அறிவிப்பால் எழும் புதிய கேள்விகள். திமுக எதிர்ப்பு வாக்காளர்களை நீக்கவும், போலி வாக்காளர்களை சேர்க்கவும் இது ஒரு சதி” என தமிழக பாஜக மாநில செய்தித் தொடர்பாளர் ஏ.என்.எஸ். பிரசாத் கடும் குற்றச்சாட்டு

தூத்துக்குடி லீக்ஸ் — நாளிதழ் செய்தி

சென்னை 18

தமிழகம் முழுவதும் நவம்பர் 4ஆம் தேதி முதல் நடைபெற்று வரும் சிறப்பு தீவிர வாக்காளர் பட்டியல் திருத்தப் பணிகள் (SIR) சுற்றியுள்ள சர்ச்சை அதிகரித்துள்ளது. வாக்காளர் பட்டியலில் உள்ள போலி பெயர்களை நீக்கி, தகுதியான புதிய வாக்காளர்களை சேர்ப்பது என்ற தேர்தல் ஆணையத்தின் முக்கிய முயற்சியை திமுக திட்டமிட்டே திசை திருப்ப முயல்கிறது என எதிர்க்கட்சிகள் குற்றம் சாட்டுகின்றன.

மாடல் 

சட்டப்படி 20 ஆண்டுகளுக்கு ஒருமுறை நடைபெறும் இந்நடவடிக்கையில், திமுக கட்சித் தலைவர்கள் மற்றும் தொண்டர்கள் அதிகாரப்பூர்வ அரசு ஊழியர்களுக்குப் பதிலாக வீடு வீடாக எஸ்.ஐ.ஆர் படிவங்களை வழங்குவதாக பல இடங்களில் புகார் எழுந்துள்ளது. குறிப்பாக திமுக ஆதரவாளர்களுக்கு மட்டுமே படிவங்கள் வழங்கப்படுகின்றன, திமுக எதிர்ப்பு வாக்காளர்களுக்கு வழங்கப்படுவதில் சிரமங்கள் உள்ளன என்பது மக்கள் மத்தியில் பெரும் அதிருப்தியை உருவாக்கியுள்ளது.

இந்நிலையில், வருவாய்த்துறை ஊழியர் சங்கங்கள் இன்று (18.11.2025) முதல் எஸ்.ஐ.ஆர் பணிகளில் ஈடுபடமாட்டோம் என்று வெளியிட்ட அறிவிப்பு பரபரப்பை ஏற்படுத்தியுள்ளது. ஏற்கனவே பல இடங்களில் திமுக நிர்வாகிகளே படிவப் பணிகளை மேற்கொண்டு வரும் சூழலில், வருவாய்த்துறை ஊழியர்களின் விலகல், எஸ்.ஐ.ஆர் முழுவதும் திமுகவின் கையில் சென்று விடும் அபாயத்தை ஏற்படுத்தும் என எதிர்க்கட்சிகள் கண்டனம் தெரிவிக்கின்றன.

“இதற்கெல்லாம் முதல்வர் மு.க. ஸ்டாலின் அறியாமல் நடப்பது இல்லை. திமுக எதிர்ப்பு வாக்காளர்களை நீக்கவும், போலி வாக்காளர்களை சேர்க்கவும் இது ஒரு சதி” என தமிழக பாஜக மாநில செய்தித் தொடர்பாளர் ஏ.என்.எஸ். பிரசாத் கடும் குற்றச்சாட்டு முன்வைத்துள்ளார்.

தேர்தல் ஆணையத்தின் நேரடி உத்தரவுகளை மீறுவது, குறிப்பாக அரசு ஊழியர்கள் மூலம் வாக்காளர் பணிகளை மறுப்பது, அரசியலமைப்பு சட்டத்திற்கு எதிரானது என்றும் அவர் எச்சரித்துள்ளார்.

ஏ.என்.எஸ். பிரசாத் வெளியிட்ட முக்கிய குற்றச்சாட்டுகள்:

• திமுக கடந்த 4 ஆண்டுகளில் பல்லாயிரக்கணக்கில் போலி வாக்காளர்களை சேர்த்து வைத்துள்ளது.
• எஸ்.ஐ.ஆர் மூலம் இவை அனைத்தும் நீங்கிவிடும் என்பதால், திமுக தேர்தல் கமிஷனை தொடர்ந்து அவதூறு பரப்புகிறது.
• பல்வேறு பகுதிகளில் திமுகவினரே படிவங்களை வழங்கி வாக்காளர் பட்டியல் திருத்தத்தை முழுமையாகக் கட்டுப்படுத்துகிறார்கள்.
• வருவாய்த்துறை ஊழியர்கள் எஸ்.ஐ.ஆர் பணிகளில் இருந்து விலகுவது, திமுக ஊக்குவிப்பால் ஏற்படும் மறைமுக மிரட்டல் நடவடிக்கை ஆகும்.
• அரசு ஊழியர்கள் அரசியல் சார்பற்றவர்களாக இருக்க வேண்டியது அவசியம்; தேர்தல் ஆணையத்தின் உத்தரவை மீறுவது மோசமான விளைவுகளை ஏற்படுத்தும்.

பிரசாதின் கோரிக்கைகள்:

• திமுக அரசு தேர்தல் ஆணையத்திற்கு விடுக்கும் மறைமுக அழுத்தத்துக்கு கடுமையான நடவடிக்கை எடுக்க வேண்டும்.
• போலி வாக்காளர்கள் இல்லாத தமிழகம் உருவாக மாநில அரசு தேர்தல் ஆணையத்துக்கு முழு ஒத்துழைப்பு தர வேண்டும்.
• முதலமைச்சர் ஸ்டாலின், ஆதாரம் இல்லாத குற்றச்சாட்டுகளை முன்வைத்து மக்களை குழப்பும் அவதூறு பிரச்சாரத்தை நிறுத்த வேண்டும்.

இந்நிலையில், மாநிலம் முழுவதும் எஸ்.ஐ.ஆர் நடவடிக்கையின் நம்பகத்தன்மை மற்றும் சீர்திருத்த முயற்சியின் நியாயத்தன்மை குறித்து பொதுமக்களிடையே பெரும் கேள்விகள் எழுந்துள்ளன.

— தூத்துக்குடி லீக்ஸ்