பால் உற்பத்தியாளர்களுக்கு மூலிகை மருத்துவம்: விழிப்புணர்வு கருத்தரங்கு

 தூத்துக்குடி, நவம்பர் 8 – 

தமிழ்நாடு பால் உற்பத்தியாளர் சங்கம் மற்றும் தூத்துக்குடி மாவட்ட கூட்டுறவு பால் உற்பத்தியாளர்கள் இணைந்து நடத்திய ராஷ்ட்ரிய கோகுல் மிஷன் 2025-2026 நவீன தொழில்நுட்ப விழிப்புணர்வு கருத்தரங்கு முகாம் தூத்துக்குடியில் உள்ள தனியார் திருமண மண்டபத்தில் நடைபெற்றது.

சுத்தமான பால் உற்பத்திக்கு மூலிகை மருத்துவம்

தமிழ்நாடு பால்வளத்துறை மற்றும் கால்நடை பராமரிப்பு துறை சுத்தமான பால் உற்பத்திக்கான முதல் படியாக மூலிகை மருத்துவத்தை பண்ணையாளர்கள் பயன்படுத்த அறிவுறுத்தி வருகிறது. பால் உற்பத்தியாளர்கள் கள அளவில் பயன்படுத்தக்கூடிய மருந்துகள் இயற்கை சார்ந்ததாக இருக்க வேண்டும் என்பதை வலியுறுத்தி கருத்தரங்கில் விளக்கப்பட்டது.

நோய்களுக்கான இயற்கை தீர்வுகள்

மடி நோய், காய்ச்சல், கழிசல், வயிறு உப்புசம், கோமாரி, பெரியம்மை போன்ற தொற்று நோய்களை தடுப்பூசி தவிர, அடுத்த நிலைகளில் "வருமுன் காப்போம், வந்த பின் நோய் நீக்கம்" என்ற அடிப்படையில் மூலிகை மருத்துவ முறைகள் விளக்கப்பட்டன.

நடைமுறை எடுத்துக்காட்டுகள்

மடி நோய் கட்டுப்பாட்டுக்கு:

சோற்றுக்கற்றாழை 50 கிராம்

மஞ்சள் தூள் ஒரு குட்டை பாக்கு அளவு

சுத்தமான புதிய சுண்ணாம்பு

அலர்ஜி, ஒவ்வாமை, சிறு பாம்பு கடி, தேள் கடி, இளம் பயிர் விஷம் போன்றவற்றுக்கு:

வெற்றிலை

மிளகு

உப்பு

இந்த மூன்று பொருட்களை கொண்டு கால்நடை மருத்துவர் வரும் வரை முதலுதவி அளிக்க முடியும் என்று விளக்கப்பட்டது.

மரபு வழி சித்த மருத்துவத்தின் நன்மைகள்

கருத்தரங்கில் பேசியவர்கள் கூறியதாவது:

"மரபு வழி சித்த மூலிகை மருத்துவம் கால்நடைகளுக்கு முதலுதவியாக பயன்படுத்துவதால் பாலும் சுத்தமாக இருக்கும். கால்நடைகளில் இருந்து பெறக்கூடிய சாணம் மற்றும் சிறுநீர் மண்ணுக்கு செல்லும்போது நுண்ணுயிரிகளை பெருக்குவதற்கு உதவி செய்யும்."

வந்திருந்த பண்ணையாளர்கள் முழு ஆர்வத்துடனும் கவனமாகவும் இந்த மருத்துவ முறைகளை கற்றுக்கொண்டதாக அமைப்பாளர்கள் தெரிவித்தனர்.

மருந்து எதிர்ப்பு தன்மையை குறைக்கும் முயற்சி

நுண்ணுயிரிகள் மருந்து பொருட்களில் எதிர்ப்பு தன்மையை காட்டுவது மிக மோசமான பிரச்சனையாக உள்ளது. இதை கட்டுப்படுத்துவதற்காக உலக வேளாண் நிறுவனம், உலக சுகாதார நிறுவனம், உலக கால்நடை நல நிறுவனம் ஆகியவை ஒன்றாக இணைந்து தொடர்ந்து பத்து ஆண்டுகளாக போராடி வருகின்றன.

தமிழகம் முழுவதும் பயிற்சி முகாம்கள்

தமிழ்நாடு கால்நடை மருத்துவ அறிவியல் பல்கலைக்கழகம் மற்றும் தேசிய பால்வள நிறுவனம் கடந்த 25 ஆண்டுகளாக இந்த மருத்துவ முறைகளை வெற்றிகரமாக இந்தியா முழுவதும் எடுத்துச் செல்கின்றன.

"மருந்து பொருள் தேவையை குறைப்பதற்கும், பாதுகாக்கப்பட வேண்டிய உயிர்காக்கும் மருந்துகளை தேவைக்கு பயன்படுத்துவதற்கும் இது உதவி செய்கிறது. நமது மரபு வழி சித்த வைத்தியம் நல்ல மாற்றாக இருப்பதால், தமிழக அரசு தமிழக பால்வளத் துறை மூலமாக கால்நடை மருத்துவர்கள் மற்றும் விரிவாக்க அலுவலர்கள் மூலம் பண்ணையாளர்களுக்கு சுத்தமான பால் உற்பத்தி செய்வதற்கான பயிற்சி முகாம்களை தமிழகம் முழுவதும் நடத்தி வருகிறது" என்று தெரிவிக்கப்பட்டது.

எதிர்காலம்

அடுத்த கட்டமாக பண்ணையாளர்கள் உற்பத்தி செய்யும் பாலின் அளவை அதிகரிப்பதும், தரம் சிறப்பாக இருக்க செய்வதும் முன்னேற்றமாக இருக்கும் என்று கருத்தரங்கில் தெரிவிக்கப்பட்டது. தூத்துக்குடி மாவட்டத்தில் பால் வளம் பெருக வாழ்த்துக்கள் தெரிவிக்கப்பட்டன.

(தூத்துக்குடி லீக்ஸ் சிறப்பு நிருபர் )