தூத்துக்குடியில் 686 கேமராக்கள் மூலம் நகரம் முழுவதும் 24 மணி நேர கண்காணிப்பு

by thoothukudileaks on 3:46 AM in தூத்துக்குடி போலீஸ், Police News, Tamil Nadu updates, thoothukudinews

தூத்துக்குடி மாவட்டத்தில் நவீன காவல் கண்காணிப்பு மையம் இன்று தொடக்கம்

686 கேமராக்கள் மூலம் நகரம் முழுவதும் 24 மணி நேர கண்காணிப்பு

தூத்துக்குடி, அக்டோபர் 18 - தூத்துக்குடி மாவட்டத்தில் ஒருங்கிணைந்த நவீன காவல் கட்டுப்பாட்டு மற்றும் கண்காணிப்பு மையம் இன்று புதிதாக நிறுவப்பட்டு செயல்பாட்டிற்கு வந்துள்ளது.

அமைச்சர் கீதாஜீவன் ரிப்பன் வெட்டி திறந்து வைத்தார் வீடியோ பார்க்க

மாவட்ட காவல் கண்காணிப்பாளர். ஆல்பர்ட் ஜான், இ.கா.ப. அறிவுறுத்தல்படி, தூத்துக்குடி நகர உட்கோட்ட உதவி காவல் கண்காணிப்பாளர் டாக்டர். சி.மதன், இ.கா.ப. கண்காணிப்பில் இந்த நவீன திட்டம் செயல்படுத்தப்பட்டுள்ளது.

மூன்று கட்டமாக 686 கேமராக்கள்

தூத்துக்குடி மாநகராட்சியின் அனுமதியுடன் தனியார் நிறுவன பங்களிப்பில், மூன்று கட்டமாக முக்கிய சாலைகள், சந்திப்புகள் மற்றும் குடியிருப்பு பகுதிகளில் மொத்தம் 686 கண்காணிப்பு கேமராக்கள் நிறுவப்பட்டுள்ளன. இதில் வாகன எண் தகடுகளை தானாகவே பதிவு செய்யும் ANPR (Automatic Number Plate Recognition) தொழில்நுட்பம் கொண்ட 30 சிறப்பு கேமராக்களும் அடங்கும்.

இன்று முதல் கட்டமாக 430 கண்காணிப்பு கேமராக்கள் செயல்பாட்டிற்கு வந்துள்ளன. மீதமுள்ள கேமராக்களும் விரைவில் இயக்கப்படும் என காவல்துறை தெரிவித்துள்ளது.

அதி நவீன தொழில்நுட்ப வசதிகள்

நிறுவப்பட்டுள்ள கேமராக்கள் மிக துல்லியமான பார்வை திறன் கொண்டவை. சுமார் 30 நாட்கள் காட்சிகளை சேமித்து வைக்கும் திறன் கொண்டவை. மின்சாரம் தடைபட்டாலும் பேட்டரி மூலம் மூன்று நாட்கள் வரை செயல்படும் வசதியும் உள்ளது.

ஆத்தி இம்புட்டும் தெரியுமா???

கேமராவை சேதப்படுத்தவோ திசை மாற்றவோ யாராவது முயன்றால் உடனடியாக எச்சரிக்கை அறிவிப்பு வழங்கப்படும். தனிப்பட்ட மின்சார இணைப்பு மற்றும் கண்காணிப்பு வழித்தடம் கொண்டதால் இடையூறு ஏற்படுத்த முடியாது என காவல்துறை தெரிவித்துள்ளது.

ட்ரோன் கண்காணிப்பு அமைப்பு

இரவு நேரங்களில் ஒரு கிலோமீட்டர் தூரம் வரை துல்லியமாக பார்க்கும் வகையில் அதி நவீன தொழில்நுட்ப கேமராக்கள் பொருத்தப்பட்ட ட்ரோன்களும் பயன்பாட்டில் உள்ளன. திறன்பட பயிற்சி பெற்ற காவல்துறை குழுவினர் முக்கிய திருவிழாக்கள், பண்டிகைகள் மற்றும் மக்கள் கூட்டம் அதிகம் இருக்கும் பகுதிகளில் ட்ரோன்களை பறக்கவிட்டு, காவல் கட்டுப்பாட்டு அறையிலிருந்து நேரடியாக கண்காணிப்பர்.

பன்முக பயன்கள்

இந்த ஒருங்கிணைந்த கண்காணிப்பு அமைப்பு குற்றங்களை தடுப்பது, குற்றவாளிகளை விரைவாக கண்டுபிடிப்பது, சட்ட ஒழுங்கை நிலைநாட்டுவது மற்றும் போக்குவரத்தை ஒழுங்குபடுத்துவது ஆகிய பணிகளில் காவல்துறைக்கு பேருதவியாக இருக்கும் என காவல்துறை சார்பில் தெரிவிக்கப்பட்டுள்ளது.

தூத்துக்குடி நகர காவல் கட்டுப்பாட்டு அறையிலிருந்து இந்த கேமராக்கள் அனைத்தும் 24 மணி நேரமும் கண்காணிக்கப்படும்.

(நமது சிறப்பு நிருபர், தூத்துக்குடி)

About thoothukudileaks
Soratemplates is a blogger resources site is a provider of high quality blogger template with premium looking layout and robust design. The main mission of templatesyard is to provide the best quality blogger templates.