தூத்துக்குடியில் சைபர் மோசடியில் இழந்த ரூ.46 லட்சம் மீட்பு – பாதிக்கப்பட்டவர்களிடம் மாவட்ட காவல் கண்காணிப்பாளர் பணம் ஒப்படைப்பு

🗞️ தூத்துக்குடி லீக்ஸ்

📍 தூத்துக்குடி மாவட்டம் – 15.10.2025

தூத்துக்குடியில் சைபர் மோசடியில் இழந்த ரூ.46 லட்சம் மீட்பு – பாதிக்கப்பட்டவர்களிடம் மாவட்ட காவல் கண்காணிப்பாளர் பணம் ஒப்படைப்பு

தூத்துக்குடி மாவட்டத்தில் ஆன்லைன் மூலமாக நடைபெற்ற பல்வேறு சைபர் மோசடிகளின் மூலம் இழந்த ரூ.46,24,350/- மதிப்பிலான தொகையை சைபர் குற்றப்பிரிவு போலீசார் தொழில்நுட்பவழி விசாரணை மூலம் மீட்டுள்ளனர்.

 இன்று (15.10.2025) இந்த மீட்கப்பட்ட தொகையை மாவட்ட காவல் கண்காணிப்பாளர்  ஆல்பர்ட் ஜான் இ.கா.ப  பாதிக்கப்பட்ட நபர்களிடம் அதிகாரப்பூர்வமாக ஒப்படைத்தார்.

இந்த ஆண்டில் மட்டும் சைபர் குற்ற வழக்குகளில் மொத்தமாக ரூ.1.23 கோடி பணம் மீட்கப்பட்டு, உரிய நபர்களிடம் திருப்பி வழங்கப்பட்டுள்ளமை குறிப்பிடத்தக்கது.

சைபர் குற்றங்கள் குறித்து பதிவு செய்யப்பட்ட புகார்களின் அடிப்படையில், சைபர் குற்றப்பிரிவு கூடுதல் கண்காணிப்பாளர்  சகாய ஜோஸ் மற்றும் ஆய்வாளர்  சாந்தி தலைமையிலான சிறப்புக் குழுவினர் சம்பந்தப்பட்ட வங்கி கணக்குகளை அடையாளம் காண்பதுடன், அவற்றை உடனடியாக முடக்கியதோடு, சட்டப்பூர்வ நடவடிக்கைகள் மேற்கொண்டு இழந்த பணத்தை மீட்டுள்ளனர்.

பாதிக்கப்பட்டவர்கள் நேஷனல் சைபர் கிரைம் ரிப்போர்டிங் போர்டல் (NCRP) வாயிலாக  தங்களது புகார்களை பதிவு செய்தனர். 

இதில் "ஆன்லைனில் முதலீடு செய்தால் அதிக லாபம்", "போலி அரசு வேலை வாய்ப்பு", "டிஜிட்டல் அரஸ்ட்" போன்ற சதி வழிமுறைகள் அடிப்படையில் நபர்களிடம் பணம் இழப்பதற்கான மோசடி மேற்கொள்ளப்பட்டது.

மாவட்ட காவல்துறை சார்பில் பொதுமக்கள் எச்சரிக்கையாக இருக்கும்படி அறிவுறுத்தப்பட்டுள்ளது. சந்தேகத்திற்கிடமான இணைய இணைப்புகள், உடனடி லாபம் தரும் வாக்குறுதிகள், மற்றும் அதிகாரப்பூர்வமல்லாத வங்கிக் தகவல் கோருதல்களில் ஈடுபடாமல், எச்சரிக்கையுடன் நடந்து கொள்ளுமாறு கேட்டுக்கொள்ளப்படுகிறது.

---

🖊️ செய்தியாளர்: அருணன் 
📌 தூத்துக்குடி லீக்ஸ்

---

.