கடல் அலையின் வேகத்தால் சேதமடைந்த பாம்பன் பாலத்தின் தூண்கள்..!!

கடல் அலையின் வேகத்தால் சேதமடைந்த பாம்பன் பாலத்தின் தூண்கள்..!! அச்சத்தில் தீவு மக்கள்..!!  உடனடியாக கனரக வாகனங்களுக்கு தடை விதிக்க கோரிக்கை விடுத்துள்ளனர்..!!

            இராமேஸ்வரம் தீவையும், நிலப்பரப்பையும் இணைக்கும் பாலமாக பாம்பன் பாலம் இருந்து வருகிறது. இந்தப் பாலம் 1991 ஆம் ஆண்டு கட்டப்பட்டு 33 ஆண்டுகளுக்கு மேலாக செயல்பட்டு வருகிறது. ராமேஸ்வரம் தீவில் வாழும் ஒரு லட்சம் மக்களின் வாழ்வாதாரமாக இந்த பாலம் திகழ்கிறது. இந்த பாலத்தின் வழியே ஆண்டிற்கு மூன்று கோடி பேர் பயணிப்பதாக புள்ளி விவரம் கூறுகிறது.

 வடநாட்டிலிருந்து யாத்திரையாக ராமேஸ்வரம் கோயிலுக்கு வழிபாடு செய்ய வருவதற்கு ஒரு முக்கிய பாலமாக இது திகழ்கிறது.

         பாம்பன் ரயில் பாலம் கடந்த 2 ஆண்டுகளாக செயல்படாததால், பாம்பன் பேருந்து பாலம் தான் இந்த தீவு மக்களின் வாழ்வாதாரமாக திகழ்கிறது. இந்த பாலத்தின் வழியாகத்தான் தீவில் உள்ள ஒரு லட்சம் பேருக்கு உணவு பொருள்களும் அத்தியாவசிய பொருட்களும் கொண்டு செல்லப்படுகிறது.

        ஆனால் இந்த பாலத்தை பராமரிப்பதில் நெடுஞ்சாலைத்துறை மெத்தனமாக செயல்பட்டு வருகிறது. 

இதனால் பாலத்தின் பல பகுதியில் சேதம் அடைந்து பயணிக்க முடியாத சூழ்நிலை உள்ளது. குறிப்பாக நடுபாலம் முழுவதும் சேதம் அடைந்துள்ளது. 

எந்த நேரமும் பாலம் இடிந்து விழும் சூழ்நிலையில் பாலம் இருக்கிறது. 

ஆனால் இது குறித்து புகார்களை தெரிவித்தாலும் மத்திய, மாநில அரசுகள் மற்றும் நெடுஞ்சாலைத்துறை எந்த முறையான நடவடிக்கையையும் செய்வதில்லை. 

சேதமடைந்த பகுதி தீவு மக்கள் 

     சமீபத்தில் பாலத்தை பராமரிப்பதற்காக 20 கோடி ரூபாயில் பராமரிப்பு பணி நடந்த நிலையில், பாலம் பல்வேறு இடங்களில் மிகவும் சேதம் அடைந்த நிலையில் உள்ளது.

 இதுகுறித்து நெடுஞ்சாலைத்துறைக்கு புகார் அளித்தும் நெடுஞ்சாலைத்துறை அதிகாரிகள் கண்டு கொள்வதில்லை. ஒருவேளை மிகப்பெரிய அசம்பாவிதம் நடந்தால் தான் அரசுகள் நடவடிக்கை எடுப்பார்கள் போல.....

        தீவில் உள்ள சமூக ஆர்வலர்கள் பலர் இந்த பாம்பன் பாலத்தைக் காப்பதற்காக பல்வேறு போராட்டங்களையும், கோரிக்கைகளையும் முன்வைத்தும், அரசு செவிசாய்க்காத நிலையில், பலமுறை நீதிமன்றங்கள் சென்று இந்த பாலத்திற்கு பராமரிப்பு மற்றும் விளக்கு எரிவதற்கான உத்தரவுகளை போராடி பெற்று ஓரளவுக்கு பாலத்தை காப்பாற்றி வருகிறார்கள். 

தற்போதும் பாலத்தைக் காக்க தீவு மக்கள் நீதிமன்றத்தைத் தான் நாடு வேண்டிய சூழ்நிலையில் உள்ளோம்.

          கடந்த இரண்டு நாட்களுக்கு முன்பாக கடலிலுள்ள பாம்பன் பாலத்தின் ஆறாவது தூண் கடல் அலையின் சீற்றத்தால் கடுமையாக சேதம் அடைந்துள்ளது. இதனால் தீவில் உள்ள மக்கள் பாம்பன் பாலம் உடைந்து விடுமோ..!?என்ற அச்சத்தில் உள்ளனர்.

 பாம்பன் பாலத்தில் ஏதாவது அசம்பாவிதம் ஏற்படும் பட்சத்தில் தீவில் உள்ள ஒரு லட்சம் மக்களின் வாழ்வாதாரம் முற்றிலும் பாதிக்கப்படும். 

         எனவே இந்த விஷயத்தில் மத்திய மாநில அரசுகள் தலையிட்டு உடனடியாக இந்தப் பாலத்தை பராமரித்ததற்கு போர்கால அடிப்படைகள் நடவடிக்கை எடுக்க வேண்டும். 

பாம்பன் பாலத்தை முறையாக பராமரிக்காத நெடுஞ்சாலைத்துறை அதிகாரிகள் மற்றும் ஒப்பந்ததாரர்கள் மீது நடவடிக்கை எடுக்க வேண்டும்.

      அதேசமயம் தற்போது உள்ள சூழ்நிலையில் பாம்பன் பாலத்தை காக்க  உடனடியாக பாம்பன் பாலத்தில் கனரக வாகனங்கள் செல்ல தடை விதிக்க வேண்டும் என கோரிக்கையை தீவு மக்கள் சார்பில் முன்வைக்கிறோம்.

சே. ஜான் போஸ்கோ ,

நிருபர்,

தூத்துக்குடி.