பொது விநியோக திட்டம் தனித்துறையாக்க வேண்டும் என்று நியாயவிலை கடை பணியாளர்கள் தமிழக முதல்வரிடம் கோரிக்கை!!!

 

பெறுநர்:

மாண்புமிகு தமிழ்நாடு முதலமைச்சர் அவர்கள்,

தமிழ்நாடு அரசு, தலைமை செயலகம்,

சென்னை-600009.

பெருமதிப்புக்குரிய அய்யா வணக்கம்,

பொருள் : பொது விநியோக திட்டம் தனித்துறை ஆக்கப்பட்டால், கூட்டுறவுத்துறையால் தமிழ்நாடு அரசுக்கு ஏற்படும் கூடுதல் செலவு தடுக்கப்படுவது குறித்து மாண்புமிகு முதலமைச்சர் அவர்கள் பார்வைக்கு சமர்ப்பித்தல்.

கூட்டுறவுதுறை பொது விநியோக அலுவலர்கள் நியாயவிலை கடை ஆய்வு செய்யும் பணியை மட்டுமே செய்துவருகிறார்கள்.

தமிழ்நாடு உணவுப்பொருள் வழங்கல் மற்றும் நுகர்வோர் பாதுகாப்புத்துறை அலுவலர்கள் கீழ்க்கண்ட

1, குடும்ப அட்டை வழங்குதல்,

2, நியாயவிலை கடைகளுக்கு பொருட்கள் ஒதுக்கீடு செய்தல்,

3, ஒதுக்கீட்டில் குறைவு ( தவறு ) ஏற்படும் போது சரி செய்தல்,

4, ஒதுக்கீடு செய்யப்பட்டது கிடங்குகளிலிருந்து முறையாக நகர்வு செய்தல்,

5, குடும்ப அட்டைக்கு முறையாக வினியோகம் செய்தல்,

6, போலி குடும்ப அட்டைகள் ஆய்வு செய்து ரத்து செய்தல்,

7, குடும்ப அட்டைக்கு அரசு அறிவிக்கும் திட்டங்களை முறைப்படி செயல்படுத்த ஆணைகள் வழங்குவது,

8, ஆணைகளின்படி நியாயவிலை கடைகள் செயல்படுவதை கண்காணிப்பது,

9, பயோமெட்ரிக் முறையை செயல்படுத்துதல்,

10, POS மெஷினில் ஏற்படும்  பழுது நீக்கம் மற்றும் ஆன்லைன் தவறுகளை சரி செய்தல்,

11, கிடங்குகளில் ஆய்வு செய்தல்,

12, தனியார் இடங்களில் உரிய ஆவணங்கள் இல்லாத அத்தியாவசிய பொருட்கள் பறிமுதல் செய்தல்,

13, அத்தியாவசிய பொருட்கள் இருப்பு வைத்தல், விற்பனை செய்ய உரிமம் வழங்குதல்,

14, பொதுமக்கள் புகார்கள் மீது உரிய நடவடிக்கை எடுத்து குறைகளை நிவர்த்தி செய்தல்,

இவ்வளவு பணிகளையும் உணவுப்பொருள் வழங்கல் துறை அலுவலர்கள் செய்கிறார்கள்.

மேற்கூறியதில்  நியாயவிலைகடை ஆய்வு பணியை மட்டும் கூட்டுறவுத்துறை செய்து தாங்கள் தான் பொது விநியோக திட்டத்தை சிறப்பாக செயல்படுத்துவது போல் பொய் தோற்றத்தை ஏற்படுத்தி பணி செய்வது போல் நடித்து அரசு பணத்தை ஆண்டுக்கு சுமார் ரூபாய் 130 கோடிகள் வரை சம்பளமாக பெற்று வருகிறார்கள்.

மேலும் கூட்டுறவுத்துறை அதிகாரிகள் தன்னிச்சையாக பொதுமக்கள் வாங்க விரும்பாத வெளிச்சந்தையில் விளம்பரம் இல்லாத தரமற்ற பொருட்கள் கொள்முதல் செய்து நியாயவிலை கடைகளில் கட்டாய விற்பனை செய்ய கட்டாய படுத்துகிறார்கள்.

பொது விநியோக திட்டம் தனித்துறை ஆக்கப்பட்டால் வேலையே செய்யாமல் வேலை செய்வதுபோல் நடிக்கும் கூட்டுறவுத்துறை அதிகாரிகள் வாங்கும் சம்பளம் மற்றும் இதர படிகள் அரசுக்கு செலவு குறையும்.

பொது விநியோக திட்ட கூட்டுறவு அலுவலர்களை துறை சார்ந்த பணிக்கோ அல்லது அரசின் மாற்று பணிகளுக்கு பயன்படுத்தினால் அரசின் செலவு குறையும்.

தாயுள்ளம் கொண்ட மாண்புமிகு முதலமைச்சர் அவர்கள் உரிய நடவடிக்கை எடுத்து பொது விநியோக திட்டம் தனித்துறையாக்க வேண்டும் என்று அனைத்து நியாயவிலை கடை பணியாளர்கள் சார்பாக பணிவுடன் கேட்டுக் கொள்கிறோம்.

நன்றியுடன்.

பொது விநியோக திட்ட கூட்டுறவு நியாயவிலை கடை பணியாளர்கள்.

இவ்வாறு தமிழக முதல்வருக்கு அனுப்பிய மனுவில் தெரிவித்துள்ளார்கள்.