தலித் மக்களை வஞ்சிக்கும்போக்கை கடைபிடித்து வரும் அதிமுக அரசைக் கண்டித்து தூத்துக்குடி மாவட்ட ஆட்சியர் அலுவலகம் முன்பு ஆர்ப்பாட்டம் நடத்திய இளஞ்சிறுத்தைகள் கைது!!.

  தொடர்ந்து தலித் மக்களை வஞ்சிக்கும்போக்கை கடைபிடித்து வரும் அதிமுக அரசைக் கண்டித்து தூத்துக்குடி மாவட்ட ஆட்சியர் அலுவலகம் முன்பு ஆர்ப்பாட்டம் நடத்திய இளஞ்சிறுத்தைகள் கைது.

திசம்பர் 21

தூத்துக்குடி 

போஸ்ட் மெட்ரிக் ஸ்காலர்ஷிப்புக்கான நிதியைக் குறைத்து பல்லாயிரக்கணக்கான தலித் மாணவர்களின் உயர்கல்வியைப் பறித்தது;  அமைச்சரவையிலும் நிர்வாகத்திலும் ஆதிதிராவிடர்களைத் தொடர்ந்து புறக்கணித்துவருவது;  தலித் மக்கள் மீதான தாக்குதல்களைத் தடுத்து நிறுத்தாமலும், ஆணவக் கொலைகளைக் கட்டுப்படுத்தாமலும் வேடிக்கை பார்ப்பது ; சென்னை உயர்நீதிமன்றம் ஆறு ஆண்டுகளுக்கு முன்பே உத்தரவிட்டும் மாநில எஸ்சி ஆணையத்தை இதுவரை அமைக்காமல் இழுத்தடிப்பது;  பஞ்சாயத்து துணைத்தலைவர் பதவிகளிலும் பஞ்சாயத்து செயலர் பதவிகளிலும் எஸ்சி மக்களுக்கு இட ஒதுக்கீடு வழங்க வேண்டும் என்று சென்னை உயர்நீதிமன்றம் அறிவுறுத்தியும் அதற்கான எந்த நடவடிக்கையும் எடுக்காமல் இருப்பது; அதனால் தலித் பஞ்சாயத்துத் தலைவர்கள் செயல்பட விடாது  முடக்கப்படுவதற்கு மறைமுகமாகத் துணைபோவது; மனுஸ்மிருதியில் இருப்பதை மேற்கோள்காட்டியதற்காக தலைவர் திருமாவளவன் அவர்கள் மீது அவசர அவசரமாக  பல்வேறு பிரிவுகளின்கீழ் வழக்குப் பதிவு செய்தது; ஆனால் நூற்றுக்கணக்கில் புகார் கொடுத்தும் கூட வெறுப்பு பிரச்சாரத்தில் ஈடுபடும் பாஜக மற்றும் சங்பரிவார் அமைப்பினர்மீது எந்த நடவடிக்கையும் எடுக்காமல் அவர்களைப் பாதுகாப்பது; அரசுப்பணிகளில் ஆதிதிராவிட மக்களுக்கான இடங்களை சரிவர நிரப்பாமல் வஞ்சிப்பது;  ஆதிதிராவிட மக்களுக்கு பட்டா வழங்குவதில் கூட பாரபட்சம் காட்டுவது ; பஞ்சமி நிலம் இரண்டரை இலட்சம் ஏக்கர் கண்டறியப்பட்ட பிறகும்கூட அதை உரியவர்களுக்கு வழங்காமல் காலம் தாழ்த்துவது...

இதுபோன்று பல்வேறு நடவடிக்கைகளில் தலித் மக்களுக்கு எதிராக செயல்பட்டுவரும்  அதிமுக அரசைக்  கண்டித்து இளஞ்சிறுத்தைகள் எழுச்சிப்பாசறையின் சார்பில் தூத்துக்குடி மாவட்ட ஆட்சியர் அலுவலகம் முன்பு ஆர்ப்பாட்டம் நடைபெற்றது.

இளஞ்சிறுத்தைகள் எழுச்சிப்பாசறையின் மாவட்ட அமைப்பாளர் விடுதலைச்செழியன் தலைமையில் நடைபெற்ற இந்த ஆர்ப்பாட்டத்தில் மண்டலச்செயலாளர் தமிழினியன், கொள்கை பரப்பு செயலாளர் தமிழ்க்குட்டி, முற்போக்கு மாணவர் கழகத்தின் மாவட்ட அமைப்பாளர் இரகுவரன், திருச்செந்தூர் ஒன்றிய தொண்டரணி அமைப்பாளர் சுந்தர், இளஞ்சிறுத்தைகளின் ஏரல் நகர அமைப்பாளர் அஜித் மற்றும் இளஞ்சிறுத்தைகளின் பொறுப்பாளர்கள் ஆத்திமுத்து, இராமகிருஷ்ணன், தினேஷ், சுதாகர், ஜோதி, முத்துஅரசன், பாலா, முனிஷ், சதீஷ், தினேஷ், சரண்ராஜ் உள்ளிட்ட ஏராளமானோர் கலந்துகொண்டனர். ஆர்ப்பாட்டத்தில் ஈடுபட்ட அனைவரையும் காவல்துறையினர் கைது செய்து மண்டபத்திற்கு கொண்டு சென்றனர்