வாகனச் சோதனையில் 914 கிலோ தடை செய்யப்பட்ட புகையிலைப் பொருட்கள் பறிமுதல் 4 பேர் கைது ரூ.7.57 லட்சம் பணம் மற்றும் கடத்தலுக்கு பயன்படுத்திய வாகனம் பறிமுதல்

வாகனச் சோதனையில் 914 கிலோ தடை செய்யப்பட்ட புகையிலைப் பொருட்கள் பறிமுதல்

4 பேர் கைது ரூ.7.57 லட்சம் பணம் மற்றும் கடத்தலுக்கு பயன்படுத்திய வாகனம் பறிமுதல்

திருநெல்வேலி: செப் 2திருநெல்வேலி சரகத்திற்குட்பட்ட திருநெல்வேலி, தூத்துக்குடி, தென்காசி மற்றும் கன்னியாகுமரி மாவட்டங்களில் சட்டவிரோத நடவடிக்கைகளைத் தடுக்கும் வகையில், மாவட்ட காவல் கண்காணிப்பாளர்களின் நேரடி மேற்பார்வையில் வாகனச் சோதனை மற்றும் கண்காணிப்புப் பணிகள் தீவிரப்படுத்தப்பட்டுள்ளன.

இதன் தொடர்ச்சியாக, ஒரே நாளில் திருநெல்வேலி மற்றும் தூத்துக்குடி மாவட்டங்களில் நடைபெற்ற வாகனச் சோதனையில் மொத்தம் 914 கிலோ தடை செய்யப்பட்ட புகையிலைப் பொருட்கள் பறிமுதல் செய்யப்பட்டதுடன், அவற்றுடன் தொடர்புடைய 4 பேர் கைது செய்யப்பட்டுள்ளனர்.

திருநெல்வேலி மாவட்டம்:
ஏர்வாடி காவல் நிலைய எல்லைக்குட்பட்ட பகுதியில் காவல்துறையினருக்கு கிடைத்த ரகசிய தகவலின் அடிப்படையில், தடை செய்யப்பட்ட புகையிலைப் பொருட்கள் பதுக்கி வைக்கப்பட்டிருந்தது கண்டறியப்பட்டது. இதுதொடர்பாக வள்ளியூரைச் சேர்ந்த கண்ணன் (53), மறுகால்குறிச்சியைச் சேர்ந்த ஐயப்பன் (40) ஆகிய இருவர் கைது செய்யப்பட்டனர். அவர்களிடமிருந்து சுமார் 314 கிலோ தடை செய்யப்பட்ட புகையிலைப் பொருட்கள் பறிமுதல் செய்யப்பட்டன.

தூத்துக்குடி மாவட்டம்:
கோவில்பட்டி மேற்கு காவல் நிலைய எல்லைக்குட்பட்ட பகுதியில் காவல்துறையினர் நடத்திய வாகனச் சோதனையில், சக்கர வாகனத்தில் கடத்திச் செல்லப்பட்ட 53 மூட்டைகளில் சுமார் 600 கிலோ தடை செய்யப்பட்ட புகையிலைப் பொருட்கள் பறிமுதல் செய்யப்பட்டன.

இந்தச் சம்பவம் தொடர்பாக வேல்முருகன் (49), ரமேஷ் (47) ஆகிய இருவர் கைது செய்யப்பட்டுள்ளனர். அவர்களிடமிருந்து ரூ.7,57,500 ரொக்கப் பணமும், புகையிலைப் பொருட்களை கடத்த பயன்படுத்தப்பட்ட வாகனமும் பறிமுதல் செய்யப்பட்டுள்ளதாக காவல்துறை தெரிவித்துள்ளது.

தடை செய்யப்பட்ட புகையிலைப் பொருட்களின் கடத்தல், பதுக்கல் மற்றும் சட்டவிரோத விற்பனையில் ஈடுபடுவோர் மீது சட்டப்படி கடுமையான நடவடிக்கை தொடர்ந்து மேற்கொள்ளப்படும் என தெரிவிக்கப்பட்டுள்ளது.

மேலும், திருநெல்வேலி சரகம் முழுவதும் வாகனச் சோதனை மற்றும் கண்காணிப்புப் பணிகள் தொடர்ந்து தீவிரப்படுத்தப்பட்டுள்ளன. கைது செய்யப்பட்டவர்களின் நிதி தொடர்பான விசாரணையும் நடைபெற்று வருகிறது. அவர்களின் வங்கிக் கணக்கு விவரங்கள் மற்றும் நிதிப் பரிவர்த்தனை தொடர்பான தகவல்கள் சேகரிக்கப்பட்டு ஆய்வு செய்யப்பட்டு வருவதுடன், சட்ட விதிகளுக்கு உட்பட்டு வங்கிக் கணக்குகளை முடக்குவதற்கான நடவடிக்கைகளும் மேற்கொள்ளப்பட்டு வருகின்றன.