அதிக மழைக்கும் மாநகராட்சி முழு தயார்: மேயர் ஜெகன் பெரியசாமி உறுதி

தூத்துக்குடி லீக்ஸ் நாளிதழ் – செய்தி

தூத்துக்குடி:நவ 23

வடகிழக்கு பருவமழை தீவிரமாக பெய்து வரும் நிலையில், தமிழகத்தின் தென்பகுதிக் கடலோர மாவட்டங்களில் அடுத்த 3 நாட்களுக்கு கனமழை முதல் மிக கனமழை பெய்யும் என வானிலை ஆய்வுமையம் எச்சரிக்கை விடுத்துள்ளது. இதற்கிடையில், 22ஆம் தேதி இரவு பெய்த கனமழையால் தூத்துக்குடி மாநகராட்சி எல்லைக்குள் சில பகுதிகளில் மழைநீர் பெருக்கெடுத்து ஓடியது.

இதனைத் தொடர்ந்து கரிக்களம், காலணி சங்கராபுரம், மதுரை வழிச்சாலை, வடியகால் அய்யனடைப்பு, புதுக்கோட்டை, மடத்தூர், மாவட்ட கலெக்டர் அலுவலகம் அருகே 3வது மைல் உள்ளிட்ட பல பகுதிகளில் நீர்நிலைமை, வடிகால் ஓட்டம் உள்ளிட்டவற்றை மேயர் ஜெகன் பொறியசாமி நேரில் ஆய்வு செய்தார். 

மேலும் முத்தையாபுரம் உப்பாத்து ஓடை வழியாக கடலுக்கு சென்றடைந்த நீர்தேக்கம், ஓட்ட நிலை உள்ளிட்டவையும் பரிசோதிக்கப்பட்டது.

ஆய்வுக்குப் பிறகு பேசிய மேயர் ஜெகன் பெரியசாமி கூறுகையில்:

“தூத்துக்குடி மாநகராட்சியுடன் 5 ஊராட்சிகள் இணைக்கப்பட்டது. கடந்த அதிமுக ஆட்சிக்காலத்தில் அடிப்படை குடிமை பணிகள் சரியாக செய்யப்படாததன் காரணமாக 2021-ல் மாநகர்பகுதி மட்டுமின்றி புறநகர் பகுதிகளிலும் பெரும் பாதிப்பு ஏற்பட்டது. அப்போது எதிர்க்கட்சித் தலைவராக தளபதி மு.க.ஸ்டாலின் தானே வந்து நேரில் ஆய்வு செய்தார்,” என்றார்.

அவர் மேலும் தெரிவித்ததாவது:

• “திமுக ஆட்சி அமைந்ததும், உள்ளாட்சி தேர்தலில் நானும் உட்பட 60 பேர் தேர்வுசெய்யப்பட்டோம்.
• மேயராக பொறுப்பேற்றதும் முதல்-அமைச்சர் ஸ்டாலின் வழங்கிய முதல் உத்தரவு: ‘2021ல் ஏற்பட்டதைப் போல மீண்டும் எந்த பாதிப்பும் வரக் கூடாது.’
• அதனைத் தொடர்ந்து கடந்த 45 மாதங்களில் எந்த பகுதியும் புறக்கணிக்கப்படாமல் சாலை, கால்வாய், மின்விளக்கு வசதிகள் மேம்படுத்தப்பட்டன.
• 14 புதிய கால்வாய் வழித்தடங்கள் அமைக்கப்பட்டதால் மழைநீர் தடையின்றி கடலுக்கு செல்கிறது.
• முன்பு சில பகுதிகளில் 30 நாட்கள் வரை நீர் தேங்கி இருந்தது. இப்போது தொடர்மழை பெய்தாலும் 2 மணி நேரத்தில் நீர் முழுவதும் வெளியேறுகிறது.”

மேலும் தொடர்ந்த அவர்,

“மாநகராட்சியில் 58 மின்மோட்டார்கள் தயார் நிலையில் உள்ளன. 3 வார்டுகளில் மட்டும் தாழ்வான பகுதிகளில் தற்காலிக தேக்கம் உள்ளது; அங்கு மோட்டார் மற்றும் கழிவுநீர் வாகனங்கள் மூலம் உடனடி அகற்றம் செய்யப்படுகிறது. நோய்த்தொற்று தடுப்பு நடவடிக்கைகள் அனைத்து பகுதிகளிலும் சுகாதாரத்துறை மூலம் தொடர்ந்து மேற்கொள்ளப்படுகிறது,” என்றார்.

கடைசியாக,
“இத்தருணம் வரை 9 செ.மீ. மழை பெய்த போதும் பிரச்னையின்றி சமாளித்துள்ளோம். அதிக மழை பெய்தாலும் மாநகராட்சி நிர்வாகம் முழுமையான தயார்நிலையில் உள்ளது. நான் உள்பட அதிகாரிகள், ஊழியர்கள் அனைவரும் பொதுமக்கள் நலனுக்காக இரவு பகலாக பணிபுரிகின்றோம். மக்கள் எந்த அச்சமும் கொள்ள தேவையில்லை,” என மேயர் உறுதியளித்தார்.

news by sunmugasuthram press club president