Tamil Nadu updates,28-2-2025
தூத்துக்குடி லீக்ஸ் – சட்டவிரோத மணல் கொள்ளை குறித்து தமிழக பாஜக வலியுறுத்தல்
சட்டவிரோத மணல் கொள்ளைக்கு நீர்வளத்துறை அமைச்சர் துரைமுருகன் தார்மீக பொறுப்பேற்று பதவி விலக வேண்டும் - தமிழக பாஜக மாநில செய்தி தொடர்பாளர் ஏ.என்.எஸ். பிரசாத் அறிக்கை
தமிழகத்தில் சட்டவிரோத மணல் கொள்ளை தொடர்வதால், நீர்வளத்துறை அதிகாரிகள், மாவட்ட நிர்வாகம் மற்றும் அரசு இயந்திரம் உடந்தையாக செயல்பட்டு வருவதாக குற்றச்சாட்டை முன்வைத்துள்ள தமிழக பாஜக, அமைச்சர் துரைமுருகன் பதவி விலக வேண்டும் என வலியுறுத்தியுள்ளது.
அமைச்சரே கொள்ளையர்களுக்கு துணையாக செயல்படுவதால், உச்சநீதிமன்றத்தின் எச்சரிக்கையை மீறியும், தமிழக அரசு நடவடிக்கை எடுக்காமல் இருக்கிறது. கள்ளக்குறிச்சி, தூத்துக்குடி உள்ளிட்ட பல்வேறு பகுதிகளில் இரவு நேரங்களில் பொக்லைன் இயந்திரங்கள் மூலம் மணல் கொள்ளை நடைபெற்று வருவதை ஏற்கனவே ஊடகங்கள் வெளிச்சம் போட்டு காட்டியுள்ளதாகவும், அதற்கு உரிய நடவடிக்கை எடுக்கப்பட்டதாக எந்த ஆதாரமும் இல்லையெனவும் ஏ.என்.எஸ். பிரசாத் குறித்துள்ளார்.
தூத்துக்குடியில் மண் சுரண்டல் – 200 கோடி இழப்பு
தூத்துக்குடி மாவட்டத்தின் முள்ளக்காடு கடற்கரை பகுதியில் பொக்லைன் இயந்திரங்கள் மூலம் நிலச்சரிவு ஏற்படும் அளவிற்கு மண் அகழ்ந்து, ஆயிரக்கணக்கான உப்பளங்களுக்கு சட்டவிரோதமாக விற்பனை செய்யப்படுகிறது. இந்த முறைகேட்டால் தமிழக அரசுக்கு 200 முதல் 300 கோடி வரை வருவாய் இழப்பு ஏற்பட்டுள்ளதாக அவர் குறிப்பிட்டுள்ளார்.
மணல் கொள்ளை – உச்சநீதிமன்ற உத்தரவை மீறும் அரசு
2018ஆம் ஆண்டு தாக்கல் செய்யப்பட்ட வழக்கின் தொடர்ச்சியாக, 2024 டிசம்பர் 22 அன்று உச்சநீதிமன்றம், தமிழக அரசை உட்படுத்தி ஐந்து மாநிலங்களிடம் மணல் கொள்ளை குறித்த முழு தகவல்களுடன் அறிக்கை தாக்கல் செய்ய உத்தரவிட்டது. ஆனால் 2025 ஜனவரி 27ஆம் தேதி தமிழக அரசு என்ன பதில் அளித்தது என்பது இதுவரை வெளிவராத ஒரு மர்மமாக உள்ளது.
துரைமுருகன் பதவி நீக்கம் அல்லது தானாக விலக வேண்டும் – பாஜக வலியுறுத்தல்
மணல் கொள்ளையால் விவசாய நிலங்கள் அழிந்து, நிலத்தடி நீர் மட்டம் பாதிக்கப்படும் நிலை ஏற்பட்டுள்ளது.
இந்த அநியாயத்துக்கு முழு பொறுப்பு நீர்வளத்துறை அமைச்சருக்கு இருந்தாலும், அவரை பதவி நீக்கம் செய்ய தமிழக முதல்வர் தயங்குவதாகவும், முதல்வர் நடவடிக்கை எடுக்காதால் துரைமுருகன் தார்மீக பொறுப்பேற்று பதவி விலக வேண்டும் எனவும் ஏ.என்.எஸ். பிரசாத் வலியுறுத்தியுள்ளார்.
மணல் கொள்ளைக்கு வழிவகுக்கும் அதிகாரிகளை சிறப்பு விசாரணைக்கு உட்படுத்த வேண்டும்
ஏற்கனவே அமலாக்கத் துறை ₹4,730 கோடி அளவுக்கு ஊழல் பணப்பரிமாற்றம் நடந்துள்ளதாக அறிக்கை வெளியிட்டுள்ளது. இதற்கான நடவடிக்கை எடுக்க தமிழக டிஜிபி பரிந்துரை செய்தாலும், காவல்துறை இதுவரை நடவடிக்கை எடுக்கவில்லை. இதனை எதிர்கொள்ள, ஓய்வு பெற்ற உச்ச நீதிமன்ற நீதிபதி தலைமையில் விசாரணை நடத்த வேண்டும்.
மணல் கொள்ளை தடுப்பதற்கான நடவடிக்கைகள்
- தமிழகத்தில் சட்டவிரோத மணல் கொள்ளையை முற்றிலும் தடுக்க வேண்டும்.
- பொறுப்புடைய அதிகாரிகள் மீது சட்டப்படி நடவடிக்கை எடுக்க வேண்டும்.
- மணல் கொள்ளையை தடுக்கும் சமூக ஆர்வலர்கள் மற்றும் அரசு அதிகாரிகளை கொலை செய்யும் கொள்ளையர்களுக்கு கடுமையான தண்டனை வழங்க வேண்டும்.
- தமிழக காவல்துறையின் செயல்பாடுகள் சிபிஐ விசாரணைக்கு உட்படுத்தப்பட வேண்டும்.
"தமிழ்நாட்டில் சட்டவிரோத மணல் கொள்ளை தொடர்வதை தடுக்க, நீர்வளத்துறை அமைச்சரை பதவி நீக்கம் செய்யவேண்டும் அல்லது அவர் தானாக விலக வேண்டும். நமது நிலத்தடி நீர் மட்டத்தை பாதுகாக்கவும், விவசாய நிலங்களை காப்பாற்றவும், தமிழக அரசு உடனடியாக நடவடிக்கை எடுக்க வேண்டும்" என்று ஏ.என்.எஸ். பிரசாத் தனது அறிக்கையில் வலியுறுத்தியுள்ளார்.
கருத்துகள் இல்லை:
கருத்துரையிடுக