பின்தங்கிய மாநிலமாக தமிழகத்தை மாற்ற வேண்டாம்: ஒன்றிய பட்ஜெட் குறித்து கனிமொழி எம்.பி கடும் விமர்சனம்

Tamil Nadu updates,

Photo news by Arunan journalist 

சென்னை, பிப். 2-

ஒன்றிய அரசின் பட்ஜெட் பாட்னா மாடலில் அமைந்துள்ளதாகவும், தமிழகம் போன்ற வளர்ந்த மாநிலங்களை பின்தங்கிய நிலைக்கு தள்ளும் அபாயம் உள்ளதாகவும் திமுக நாடாளுமன்றக் குழுத் தலைவர் கனிமொழி கருணாநிதி எம்.பி எச்சரித்துள்ளார்.

ஒன்றிய பட்ஜெட் குறித்து நேற்று செய்தியாளர்களிடம் பேசிய அவர், ...

"பிகார் மாநிலத்திற்கு அதிக நிதி ஒதுக்கீடு செய்வதை எதிர்க்கவில்லை. 

ஆனால் பாஜக கூட்டணிக்குள்ளேயே ..

வட-தென் பாகுபாடு காணப்படுகிறது. தென்னிந்திய கூட்டணிக் கட்சிகள் ஆளும் மாநிலங்களுக்கு எந்த சலுகையும் வழங்கப்படவில்லை" என்றார்.

"தமிழகம் ஒரு ரூபாய் வருவாய் ஈட்டினால் 29 பைசா மட்டுமே திரும்ப கிடைக்கிறது. 

ஆனால் பிகார் ஒரு ரூபாய்க்கு ஏழு ரூபாய் பெறுகிறது. 

மக்கள்தொகை கட்டுப்பாடு, மனித வள மேம்பாடு போன்றவற்றில் சிறப்பாக செயல்படும் தமிழகத்திற்கு இது அநீதி" என விமர்சித்தார்.

"வடகிழக்கு மாநிலங்களுக்கு அதிக நிதி ஒதுக்கீடு செய்வது புரிகிறது. 

ஆனால் பிற மாநிலங்களை புறக்கணிப்பது ஏற்புடையதல்ல. தமிழகம் போன்ற வளர்ந்த மாநிலங்களை பின்தங்கிய நிலைக்கு தள்ள வேண்டாம் என்பதே எங்கள் கோரிக்கை" என்று கனிமொழி வலியுறுத்தினார்.

மாநில அளவில் கோயம்புத்தூர் போன்ற வளர்ந்த மாவட்டங்களுக்கும் திட்டங்கள் வழங்கி, அதே நேரம் பின்தங்கிய மாவட்டங்களுக்கும் நியாயமான நிதி ஒதுக்கீடு செய்வது போல, ஒன்றிய அரசும் சமச்சீர் வளர்ச்சியை கடைபிடிக்க வேண்டும் என்றும் அவர் கேட்டுக்கொண்டார்.

நடுத்தர வர்க்கத்தினருக்கான வருமான வரி சலுகை வரவேற்கத்தக்கது என்றாலும், அதில் உள்ள குழப்பங்களுக்கு நிதியமைச்சர் விளக்கம் அளிக்க வேண்டும் என்றும் கனிமொழி தெரிவித்தார்.